ბორჯომში, ახალციხესა და ადიგენში არარეგისტრირებული სახერხი საამქროები აღმოაჩინეს

2015-02-09 12:45:04, 713 ნახვა

სამართალი

გარემოსდაცვითი ზედამხედველობის დეპარტამენტის სამცხე-ჯავახეთის სამსახურის თანამშრომლებმა ბორჯომის, ახალციხისა და ადიგენის მუნიციპალიტეტებში ხე-ტყის გადამამუშავებელი არარეგისტრირებული სახერხი საამქროები აღმოაჩინეს.

გარემოს დაცვის სამინისტროს ინფორმაციით, გამოვლენილია სხვადასხვა ჯიშის ხე-მცენარეების უკანონო სარგებლობისა და უკანონო ტრანსპორტირების ფაქტებიც.

„კანონდარღვევით მოპოვებული მრგვალი მორის საერთო ოდენობა 54 კუბურ მეტრს შეადგენს. გარემოსთვის მიყენებული ზიანი 5500 ლარს აღემეტება.

არარეგისტრირებული სახერხი საამქროები დაილუქა. მასალები შემდგომი რეაგირებისთვის გადაიგზავნა რაიონულ სასამართლოებში.

ხე-ტყის გადამამუშავებელი სახერხი საამქროების მიერ გარემოსდაცვითი კანონმდებლობის დაცვის შესწავლის მიზნით, გარემოსდაცვითი ზედამხედველობის დეპარტამენტი საქართველოს მთელ ტერიტორიაზე განაგრძობს პრევენციული ღონისძიებების განხორციელებას“, - ნათქვამია გარემოს დაცვის სამინისტროს ინფორმაციაში.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან