საბერძნეთის ფინანსთა მინისტრი: ევროპა საბერძნეთის კოლაფსს არ დაუშვებს

2015-07-04 15:12:55, 990 ნახვა

მსოფლიო

საბერძნეთის ფინანსთა მინისტრმა იანის ვარუფაკისმა კრედიტორები ბერძნების „ტერორიზირებაში“ დაადანაშაულა და განაცხადა, რომ ევროპა ტრილიონ ევროს დაკარგავს, თუკი საბერძნეთის კოლაფსს დაუშვებს.

ათენის ცენტრალურ მოედანზე შეკრებილ 50 ათასამდე მოქალაქეს, მემარცხენე მინისტრმა კრედიტორთა გეგმის უარყოფისაკენ მოუწოდა და უგულებელყო ქვეყნის ევროპელი პარტნიორების გაფრთხილება იმის შესახებ, რომ კრედიტორთა პირობების გაუთვალისწინებლობის შემთხვევაში საბერძნეთმა, შესაძლოა, ევროზონა დატოვოს.

შეგახსენებთ, რომ 5 ივლისს საბერძნეთში რეფერენდუმია დაგეგმილი, რომლითაც მოსახლეობა გადაწყვეტს მიიღოს თუ არა კრედიტორების მიერ წამოყენებული პირობები. ფინანსთა მინისტრმა რამდენიმე დღის წინ განაცხადა, რომ აღნიშნული პირობების მიღების შემთხვევაში ის თანამდებობას დატოვებს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან