2015-04-23 10:50:21, 328 ნახვა

---

ირინე იმერლიშვილი: ბელარუსის მხრიდან საქართველოს მხარდაჭერა დღესაც გრძელდება, რასაც ძალიან ვაფასებთ

უშიშროების საბჭოს მდივნის ირინე იმერლიშვილის შეფასებით, საქართველოში ბელარუსის პრეზიდენტ ალექსანდრ ლუკაშენკოს ვიზიტი უაღრესად მნიშვნელოვანია.

ამის შესახებ იმერლიშვილმა ჟურნალისტებს პრეზიდენტის სასახლეში განუცხადა, სადაც ალექსანდრ ლუკაშენკოს  დახვედრის ოფიციალური ცერემონია გაიმართა. 

იმერლიშვილის განმარტებით, ლუკაშენკოს მიერ საქართველოსთვის ჩამოტანილი გზავნილები,  პრეზიდენტების შეხვედრის შემდეგ დაგეგმილ  ერთობლივ პრესკონფერენციაზე გახდება ცნობილი.

„უაღრესად მნიშვნელოვანია მისი ვიზიტი, ვინაიდან საბჭოთა კავშირის დაშლის შემდეგ პრაქტკულად, პირველად ხდება ასეთი ვიზიტი. ის გზავნილები და მხარდაჭერა, რაც ბელარუსის მხრიდან საქართველოს ტერიტორიული მთლიანობის მიმართ არსებობს, დღესაც გრძელდება, რასაც ძალიან ვაფასებთ“, - განაცხადა ირინა იმერლიშვილმა. 

კითხვაზე- იქნება თუ არა ლუკაშენკო რუსეთთან ურთიერთობების დარეგულირების საკითხში საქართველოს შუამავალი, იმერლიშვილმა ასე უპასუხა:

„სხვა ქვეყნებთანაც ვთანამშრომლობთ, იმ ქვეყნებთან, რომლებიც ევრაზიულ  კავშირში არიან გაწევრიანებული. ჩვენ გვაქვს ჩვენი გზა არჩეული. ეს არის ევროპული გზა, მაგრამ ეს არ ნიშნავს იმას, რომ არ ვითანამშრომლებთ იმ ქვეყნებთან, რომლებიც სხვა გზა აირჩიეს“, - განაცხადა ირინე იმერლიშვილმა.
ამწუთებში საქართველოს პრეზიდენტი გიორგი მარგველაშვილი ბელარუს კოლეგას პირისპირ ხვდება.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი