ჟვანია: ყუთის გადაადგილება დაცულობის მიზნით მოხდა და ბიულეტენებს არანაირი საფრთხე არ შექმნია

2016-10-08 19:44:38, 1360 ნახვა

საზოგადოება კომენტარი

ცენტრალური საარჩევნო კომისიის თავმჯდომარის თამარ ჟვანიას განცხადებით, ყველა ადასტურებს, რომ მარნეულის 48-ე უბანზე ყუთი დაცულია და ლუქის მთლიანობები დარღვეული არ არის.

როგორც ჟვანიამ ჟურნალისტებს განუცხადა, ყუთის გადაადგილება დაცულობის მიზნით მოხდა და იქ არსებულ ბიულეტენებს არანაირი საფრთხე არ შექმნია. შესაბამისად, ჟვანიას თქმით, აღნიშნულ უბანზე არჩევების ჩაშლის საფუძველი არ არსებობს:

„გავრცელდა მცდარი ინფორმაცია, რომ თითქოს ყუთი გაქრა, დაიკარგა, რაც არ შეესაბამება სიმართლეს და ამაზე უკვე განცხადებები და დასტური ასევე გააკეთეს სადამკვირვებლო ორგანიზაციებმაც. მინდა აღვნიშნო, რომ იქ შექმნილი სიტუაცია, დაპირისპირება, ამავდროულად ნახეთ, რომ იყო შენობაში შეღწევის მცდელობაც, სროლა ქვების, ფანჯრებია ჩალეწილი. ეს მოხდა სხვადასხვა პოლიტიკური პარტიების მხარდამჭერების მიერ, გარკვეული პროტესტის ნიადაგზე. თუმცა, ყუთს იცავდნენ კომისიის წევრები, იქ გახლდათ ცესკო-ს წარმომადგენელი, დამკვირვებლებიც, წარმომადგენლებიც. ყველა ადასტურებს, რომ ყუთი არის აბსოლუტურად დაცული, ლუქის მთლიანობები არ არის დარღვეული, ყუთის გადაადგილება მოხდა დაცულობის მიზნით და ამ კონკრეტულ შემთხვევაში იქ არსებულ ბიულეტენებს საარჩევნო ბიულეტენები კონვერტებშია განთავსებული, არანაირი საფრთხე არ შექმნია. შესაბამისად, არ არსებობს საფუძველი, რაც აჟიოტაჟია ატეხილი 48-ე საარჩევნო უბანთან“,-განაცხადა თამარ ჟვანიამ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან