პაკისტანში ცნობილი ჟურნალისტი და უფლებადამცველი ტერორისტებმა მოკლეს

2016-05-09 15:05:07, 1109 ნახვა

მსოფლიო

პაკისტანის ქალაქ კარაჩიში ცნობილი პაკისტანელი ჟურნალისტი და უფლებადამცველი ხურამ ზაკი მოკლეს, - ამის შესახებ ადგილობრივი მედია იუწყება.

მედიის ინფორმაციით, ზაკის უცნობმა პირებმა ცეცხლი მაშინ გაუხსნეს, როდესაც ის მეგობრებთან ერთად რესტორანში სადილობდა. წინასწარი ინფროპმაციით, 2 პირია დაშაბვებული, ჟურნალისტის მეგობარი და გამვლელი. თავდამსხმელები ადგილიდან მოტოციკლებით მიიმალნენ.

ცნობისთვის, ხურამ ზაკი იყო ინტერნეტ-გამოცემის Let Us Build Pakistan-ის რედაქტორი. აღსანიშნავია, რომ გამოცემა კონფესიათაშორის შუღლს გმობდა და დემოკრატიული ღირებულებების პროპაგანდას ეწეოდა.

მკვლელობაზე პასუხისმგებლობა მოძრაობა “თალიბანთან” დაკავშირებულმა დაჯგუფებამ აიღო. მიზეზად დაჯგუფების წევრები ზაკის მიერ ისლამაბადის წითელი მეჩეთის ერთ-ერთი ღვთისმსახურის, აბდულ აზიზის წინააღმდეგ დაწყებულ კამპანიას ასახელებენ.

მედიის ინფორმაციით, ზაკიმ სხვა პაკისტანელ უფლებადამცველებთან ერთად აზიზის წინააღმდეგ სასამართლოში სარჩელი შეიტანა. ისინი ღვთისმსახურს შიიტური უმცირესობის წინააღმდეგ ძალადობისკენ მოწოდებებში ადანაშაულებდნენ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან