ირაკლი ალადაშვილი: არც ერთი ქვეყნის სპეცსამსახურს არ გააჩნია ძალა, ტერაქტების აბსოლუტური აღკვეთა მოახდინოს

2016-03-22 18:32:40, 1016 ნახვა

კომენტარი

სამხედრო ანალიტიკური ჟურნალ "არსენალის" მთავარი რედაქტორის ირაკლი ალადაშვილის შეფასებით, დღეის მდგომარეობით, არც ერთი ქვეყნის სპეცსამსახურს არ შესწევს ძალა, ტერორისტული აქტები სრულად აღკვეთოს.

როგორც ალადაშვილმა "ექსპრესნიუსს" ბელგიაში განხორციელებულ ტერორისტულ აქტებთან დაკავშირებით საუბრისას განუცხადა, ვინაიდან ტერორისტების მხრიდან დარტყმები მოულოდნელად, მოულოდნელი მიმართულებით ხორციელდება, ამ საფრთხისგან დაცული თვით ყველაზე საუკეთესო სპეცსსამსახურების მქონე ქვეყანაც კი არაა:

"დღეს არც ერთი ქვეყნის სპეცსამსახურს არ გააჩნია იმის ძალა, რომ მოახდინოს აბსოლუტური აღკვეთა ტერორისტული აქტების, რადგან ტერორისტული აქტები ხორციელდება სხვა პრინციპით, ანუ იმ გაგებით, რომ ეს არ არის ფრონტის ხაზი, სადაც ჩანს მოწინააღმდეგე, ეს არის ე.წ. პარტიზანული შიდა ბრძოლა, როდესაც ტერორისტები დარტყმას აყენებენ იმ მხრიდან, იმ მიმართულებით, რაც არის მეტნაკლებად მოულოდნელი ხელისუფლებისთვის. იგივე ვრცელდება საქართველოზეც. მე არ მინდა, რომ ის რა ტრაგედიაც ამ ეტაპზე ევროპაში ხდება, საქართველოსთან დაკავშირებით გადმოვიტანოთ.საფრთხეები ყოველთვის არსებობს. დაცული არავინ არ არის, თვით ყველაზე საუკეთესო სპეცცსამსახურების მქონე ქვეყანა, დაახლოებით, შეიძლება იყოს ეს იგივე აშშ, იგივე რუსეთი მეტნაკლებად, ან სხვა, არც ერთი არ არის დაცული, რადგან ეს დარტყმა ხორციელდება მოულოდნელად და მოულოდნელი მიმართულებით", - განუცხადა ირაკლი ალადაშვილმა "ექსპრესნიუსს".

ცნობისთვის, დღეს ბელგიაში რამდენიმე ადგილას ტერორისტული აქტი განხორციელდა, რის შედეგადაც საერთო ჯამში, ბოლო ინფორმაციით, 34 ადამიანია დაღუპული.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან