საქართველოს თავდაცვის მინისტრის პირველი მოადგილე ლელა ჩიქოვანი სამხრეთ-აღმოსავლეთ თავდაცვის მინისტერიალის (SEDM) შეხვედრას დაესწრო. საიუბილეო, ორგანიზაციის შექმნის 20 წლისთავისადმი მიძღვნილი შეხვედრა იტალიაში, ქ. რომში გაიმართა.

მინისტერიალზე განხილვის მთავარი თემა რეგიონში უსაფრთხოების გამოწვევები, ტერორიზმიდან მომდინარე საფრთხეები და მათთან გამკლავების გზები იყო. შეხვედრაზე ორგანიზაციის წევრი ქვეყნების თავდაცვის მინისტრებმა განცხადება მიიღეს, რომელშიც გამოხატეს მზადყოფნა ხელი შეუწყონ მშვიდობის, სტაბილურობისა და უსაფრთხოების უზრუნველყოფას და ერთობლივი ძალებით შეებრძოლონ ტერორიზმს. „ვადასტურებთ მტკიცე მხარდაჭერას საერთაშორისო სამართლის ფარგლებში აღიარებული სუვერენიტეტისა და ტერიტორიული მთლიანობის პრინციპებისადმი,“ - აღნიშნულია ორგანიზაციის წევრი ქვეყნების თავდაცვის მინისტრების ერთობლივ განცხადებაში.

სამხრეთ-აღმოსავლეთ თავდაცვის მინისტერიალის (SEDM) მორიგი შეხვედრა 2017 წელს საქართველოში გაიმართება. შეხვედრას დაესწრებიან არა მარტო SEDM-ის წევრი ქვეყნების წარმომადგენლები, არამედ დაგეგმილია ნატოს წევრი ქვეყნების - ფინეთისა და შვედეთის წარმომადგენლების მოწვევაც.

სამხრეთ-აღმოსავლეთ მინისტერიალის ფარგლებში თავდაცვის მინისტრის პირველმა მოადგილემ ორმხრივი შეხვედრები გამართა მოლდოვას რესპუბლიკის თავდაცვის მინისტრთან, იტალიის თავდაცვის მინისტრის მოადგილესთან და ევროკავშირის საგარეო ქმედებათა სამსახურის კრიზისების მართვისა და დაგეგმვის დირექტორატის ხელმძღვანელთან.

(NS)

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ტრამპმა ნატო გააკრიტიკა ირანთან დაკავშირებით დახმარების სურვილის არქონის გამო

უკრაინამ სამარის ოლქში, კრასნოდარის მხარეში და სევასტოპოლში ნავთობის ობიექტებს შეუტია

პაპუაშვილმა ზახაროვას განცხადებას უპასუხა: ჩვენ ხალხის ინტერესებიდან გამომდინარე ვმოქმედებთ

კონგრესმენი უილსონი: აშშ-სთვის მნიშვნელოვანია, რომ ანაკლია პეკინის დომინირების ქვეშ არ მოექცეს