ჩაჩუას დღევანდელ პროცესზე შესაძლოა, ჟვანიასა და უსუპოვის ცხედრების ექსპერტიზის ამსახველი ვიდეომასალა აჩვენონ

2015-01-09 11:39:55, 1446 ნახვა

სამართალი

თბილისის საქალაქო სასამართლოში ზურაბ ჟვანაის გარდაცვალების საქმეზე ექსპერტის ლევან ჩაჩუას სასამართლო პროცესი დღეს განახლდება.

სხდომა ბრალდების მხარის მტკიცებულებათა გამოკვლევით გაგრძელდება.

ადვოკატ გიორგი ფანცულაიას განცხადებით, დღევანდელ პროცესზე შესაძლოა, საქმეში ბრალდებული ზურაბ ჟვანიას დაცვის ყოფილი უფროსი კობა ხარშილაძე და დაცვის წევრი მიხეილ ძაძამია დაიკითხოს, ან ზურაბ ჟვანიასა და რაულ უსუპოვის ცხედრების ექსპერტიზის ამსახველი ვიდეომასალა აჩვენონ.

"ძალზედ მნიშვნელოვანი მოწმეები არიან. უშუალოდ ჟვანიას დაცვის წევრი და დაცვის უფროსი და ასევე არის დარჩენილი ერთი ძალზედ მნიშვნელოვანი მტკიცებულება, რომელიც არის ის ვიდეომასალა, რომელიც ასახავს ექსპერტიზას გვამებზე. ამ ორიდან, თუ რომელი იქნება უშუალოდ ამ აღნიშნულ პროცესზე, ჩვენ წინასწარ არ ვიცით, ვინაიდან პროკურორები მას არ გვატყობინებენ, მაგრამ სავარაუდოდ, ამ ორიდან ერთ-ერთი დღევანდელ პროცესზე იქნება განხილული",-განაცხადა ადვოკატმა გიორგი ფანცულაიამ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან