ქეთევან ციხელაშვილი: საქართველომ ევროკავშირის შავი სიიდან, თეთრ სიაში გადაინაცვლა

2017-02-27 14:57:54, 2053 ნახვა

საზოგადოება კომენტარი

შერიგებისა და სამოქალაქო თანაშწორობის საკითხებში სახელმწიფო მინისტრის ქეთევან ციხელაშვილის განცხადებით, საქართველომ ევროკავშირის შავი სიიდან, თეთრ სიაში გადაინაცვლა.

როგორც ციხელაშვილმა ჟურნალისტებს განუცხადა, საქართველოს პასპორტმა სრულიად ახალი და სხვა დატვირთვა მიიღო.

"ეს არის ძალიან მნიშვნელოვანი დღე საქართველოს ისტორიაში. მინდა მთლიანად საქართველოს მოსახლეობას და თითოეულ მოქალაქეს მივულოცო. ჩვენ ამ დღისკენ მივდიოდით ძალიან დიდი ხანი. ბევრი რეფორმა ჩავატარეთ, რომელიც პირველ რიგში ჩვენი ქვეყნისთვისაა სასარგებლო. ვფიქრობ ძალიან დამსახურებულად მივიღეთ აღიარება და მხარდაჭერი ევროკავშირის ქვეყნებისგან. რაც მოხდა დღეს, არის სინამდვილეში ის, რომ საქართველომ ევროკავშირის შავი სიიდან, ასე ეწოდება, გადაინაცვლა თეთრ სიაში, იმ ქვეყნების სიაში, რომელთა მოქალაქეების უვიზოდ შეძლებენ მიმოსვლას. ჩვენ გადავდგით ნაბიჯები კიდევ უფრო მეტი ინტეგრაციისკენ", - განაცხადა ციხელაშვილმა.

მინისტრის თქმით, სახელმწიფომ ძალიან დიდი შრომა ჩადი ევროკავშირისკენ მიმავალ გზაში.

"ვფიქრობ, რომ ყველა მოქალაქე აცნობიერებს ამ ნაბიჯის მნიშვნელობას და ჩვენგანაც, რა თქმა უნდა მაღალ პასუხისმგებლობას ელოდება. ჩვენ ველოდებით, რომ მივიღებთ სარგებელს, არა მხოლოდ ტურისტული მიზნებისთვის, არამედ ეს ხსნის კონტაქტების შესაძლებლობებს", - აღნიშნა ქეთევან ციხელაშვილმა.

ცნობისთვის, დღეს 27 თებერვალს ევროკავშირის საბჭომ დაამტკიცა 539/2001 რეგულაციის ცვლილება, რომელიც საქართველოს მოქალაქეებისათვის უვიზო მიმოსვლის რეჟიმის შემოღებას ითვალისწინებს. ეს საბოლოო ნაბიჯია სავიზო რეჟიმის ლიბერალიზაციის საკითხზე გადაწყვეტილების მიღების პროცესში.

შეგახსენებთ, რომ საქართველოსთვის ვიზალიბერალიზაციის მინიჭების გადაწყვეტილებას ხელი 1 მარტს მოეწერება. 2 თებერვალს ევროპარლამენტმა საქართველოს ვიზალიბერალიზაციას ხმათა უმრავლესობით მხარი დაუჭირა.