კვირიკაშვილის ინფორმაციით, ბათუმის ტექნოლოგიური უნივერსიტეტის ადგილას სასტუმრო აშენდება

2015-03-11 19:36:59, 723 ნახვა

ეკონომიკა

ეკონომიკისა და მდგრადი განვითარების მინისტრის გიორგი კვირიკაშვილის ინფორმაციით, ბათუმის ტექნოლოგიური უნივერსიტეტის ადგილას სასტუმრო აშენდება და მასში 18 -დან 20 მილიონ დოლარამდე ინვესტიცია ჩაიდება.

„ბათუმის ტექნოლოგიური უნივერსიტეტის შენობა აუქციონზე 25 მილიონ დოლარად იყო გატანილი. როგორც ვიცი აუქციონი დღეს უნდა დახურულიყო. მასში ჩადებული იქნება 18-დან 20 მილიონ დოლარამდე ინვესტიცია და საუბარია სასტუმროს კომპლექსის მშენებლობაზე“, - აღნიშნა კვირიკაშვილმა.

მისივე განმარტებით, გაიყიდა ბათუმის უნივერსიტეტის შენობა და არა უნივერსიტეტი.

როგორც მინისტრმა აღნიშნა, შენობა გაყიდვას აუცილებლად ექვემდებარებოდა, რადგან იქ ინფრასტრუქტურა სავალალო მდგომარეობაში იყო.

„ეს შენობა აუცილებლად გაყიდვას ექვემდებარებოდა გამომდინარე იქიდან, რომ იქ ინფრასტრუქტურა სავალალო მდგომარეობაში იყო. კიდევ ერთხელ მინდა ავღნიშნო, რომ უნივერსიტეტი არ გაყიდულა, გაყიდულია შენობა, რომელზეც ბევრი მითქმა-მოთქმა იყო. წერილი, რომლითაც ამერიკულმა მხარემ საქართველოს მილენიუმის ფონდის წარმომადგენლობას მიმართა, ადასტურებს, რომ ეს შენობა უნივერსიტეტისათვის გამოუსადეგარი იყო. სწორედ ამიტომ მოხდა ამ შენობის გაყიდვა“, - განაცხადა გიორგი კვირიკაშვილმა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან