ეროვნულ არქივს შიომღვიმის მონასტრის თანამედროვე ფოტო და ვიდეო კადრები შეემატა

2015-02-21 12:23:29, 3233 ნახვა

კულტურა

იუსტიციის სამინისტროს ეროვნული არქივის თანამედროვე ფოტო და ვიდეომასალას შიომღვიმის მონასტრის კადრები შეემატა.

პროექტ „ეროვნული არქივის ექსპედიციების“ ფარგლებში სპეციალური ჯგუფი დღეს შიომღვიმეში იმყოფებოდა, სადაც მონასტრის ტაძრების ხედები და ფრესკები გადაიღო.

პროექტი საქართველოს ისტორიული ძეგლების შესახებ ვიდეო და ფოტომასალის მოგროვებასა და საარქივო ფონდების თანამედროვე დოკუმენტებით შევსებას ითვალისწინებს. ამ დროისათვის უკვე გადაღებულია გრემისა და ნეკრესის ტაძრები, ვარძიის კომპლექსი, უჯარმის ციხე და გელათის მონასტერი.

ცნობისთვის, ეროვნულ არქივში დაცულია ქართული ხუროთმოძღვრული და ისტორიული ძეგლების შესახებ უნიკალური კინო და ფოტოდოკუმენტები.

როგორც ეროვნულ არქივში აცხადებენ, ამ პროექტის ფარგლებში შეგროვილი მასალები კიდევ უფრო გაამდიდრებს უკვე არსებულ საგანძურს და მცირე ხანში ფასდაუდებელი წყარო იქნება ამ საკითხებით დაინტერესებული მკვლევარებისათვის.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან