ნუგზარ სურმანიძემ ტერნოპოლის დელეგაციას უმასპინძლა

2016-02-26 18:03:30, 967 ნახვა

რეგიონი

ბათუმში ოფიციალური ვიზიტით მყოფ უკრაინის ტერნოპოლის დელეგაციას აჭარის ა/რ ჯანმრთელობისა და სოციალური დაცვის მინისტრი ნუგზარ სურმანიძე შეხვდა.

აჭარის ჯანდაცვის სამინისტროს ინფორმაციით, დელეგაცია დაკომპლექტებულია ტერნოპოლის მერის მოადგილის ლეონიდ ბიცურასას, სპორტისა და ახალგაზრდობის საკითხების დეპარტამენტის, ახალგაზრდობისა და კულტურის ცენტრის, ეკონომიკის უნივერსიტეტის და ტერნოპოლის სპორტსკოლის წარმომადგენელების შემადგენლობით.

შეხვედრა გაცნობით ხასიათს ატარებდა. მხარეებმა განიხილეს აჭარის ავტონომიურ რესპუბლიკასა და ტერნოპოლის ოლქს შორის არსებული და სამომავლო თანამშრომლობა. ამჟამად ტერნოპოლის საქალაქო საავადმყოფოში კვალიფიკაციის ასამაღლებელ კურსს აჭარის ონკოლოგიური საავადმყოფოს ექიმი გადის. შეხვედრაზე მინისტრმა ვიცე მერს რეგიონის ჯანდაცვის სისტემა და სამინისტროს პრიორიტეტები გააცნო.

ტერნოპოლი და ბათუმი 2011 წლიდან დამეგობრებული ქალაქები არიან. მემორანდუმი ითვალისწინებს თანამშრომლობას ეკონომიკის, ჯანდაცვის, ტურიზმის, განათლებისა და კულტურის სფეროებში.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან