სიეტლის ფედერალურმა სასამართლომ შეერთებული შტატების პრეზიდენტ დონალდ ტრამპის საიმიგრაციო განკარგულების მოქმედება მთელი ქვეყნის მასშტაბით, დროებით შეაჩერა, - ამის შესახებ BBC იუწყება.

მედია საშუალების ინფორმაციით, პრეზიდენტის განკარგულების წინააღმდეგ სარჩელი ვაშინგტონისა და მინესოტას შტატებმა შეიტანეს.

ვაშინგტონის გენერალური პროკურატურის განცხადებით, სასამართლომ პრეზიდენტის გადაწყვეტილება არაკონსტიტუციურად უნდა ცნოს და გააუქმოს.

„არავინ დგას კანონზე მაღლა, მათ შორის არც პრეზიდენტი“, - აღნიშნა ვაშინგტონის გენერალურმა პროკურორმა, ბობ ფერგიუსონმა.

ამასთან, მედიის ცნობით, სიეტლის ფედერალური მოსამართლის მიერ მიღებულ გადაწყვეტილებას, იუსტიციის სამინისტრო გაასაჩივრებს.

გარდა ამისა, თეთრი სახლის ადმინისტრაციის განცხადებით, აშშ-ის პრეზიდენტის განკარგულება არის კანონიერი და მიზანშეწონილი. მათივე თქმით, მთავრობის მეთაურს "აქვს კონსტიტუციური უფლება და ვალდებულება ამერიკელები დაიცვას".

შეგახსენებთ, რომ დონალდ ტრამპის გადაწყვეტილებით, შვიდი მუსლიმი ქვეყნის მოქალაქეებს ამერიკაში შესვლა 90 დღის განმავლობაში აეკრძალათ. ამ განკარგულებამ აეროპორტებში ქაოსი გამოიწვია, ვინაიდან ირანის, ერაყის, ლიბიის, სომალის, სუდანის, სირიისა და იემენის მოქალაქეებს ქვეყანაში შესვლის უფლებას არ აძლევდნენ. ამასთან, განკარგულების თანახმად, ამერიკის ტერიტორიაზე შესვლა სირიელ ლტოლვილებს გაურკვეველი ვადით აეკრძალათ. აღნიშნულ განკარგულებას, დონალდ ტრამპმა ხელი 28 იანვარს მოეწერა.

აშშ-ის სახელმწიფო დეპარტამენტის ცნობით, პრეზიდენტის განკარგულების შემდეგ, ვიზა 60 000-მდე პირს გაუუქმდა.

ტრამპის გადაწყვეტილებას მასობრივი საპროტესტო აქციები მოჰყვა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

სარჯველაძე დიუშენის სინდრომის ბავშვების მშობლებზე ამბობს, რომ მათი ოჯახის წევრების ემოციებით პოლიტიკური დივიდენდების მოპოვებას ცდილობენ

დიუშენის კუნთოვანი დისტროფიის მქონე ბავშვების მშობლები მთავრობის ადმინისტრაციასთან უწყვეტ პროტესტს იწყებენ

კიევში შეიარაღებულმა პირმა ავტომატური იარაღიდან ცეცხლი გაუხსნა ხალხს, არიან დაღუპულები და დაჭრილები.

მეუღლის არასრულწლოვანი შვილების გაუპატიურებაში ბრალდებული სტუ-ს თანამშრომელი იყო