2024-11-04 22:52:25, 429 ნახვა

---

ახალციხის და ახალქალაქის რაიონულმა სასამართლოებმა არჩევნებთან დაკავშირებული არც ერთი სარჩელი არ დააკმაყოფილეს

 ახალციხისა და ახალქალაქის რაიონულ სასამართლოებმა კენჭისყრის დღეს გამოვლენილ დარღვევებთან დაკავშირებით შეტანილ სარჩელებზე გადაწყვეტილება გამოაცხადეს. სასამართლომ რეგიონის ექვსი მუნიციპალიტეტის საოლქო კომისიების წინააღმდეგ არც ერთი სარჩელი არ დააკმაყოფილა.

სარჩელები ეხებოდა ბორჯომის N36–ე, ახალციხის N37–ე, ადიგენის N38-ე, ასპინძის N39-ე, ახალქალაქის N40–ე და ნინოწმინდის N41-ე საოლქო საარჩევნო კომისიების გადაწყვეტილებებს. მოსამართლეებმა საჩივრები „უსაფუძვლობის“ მოტივით არ დააკმაყოფილეს.

რაიონული სასამართლოების მიერ მიღებული გადაწყვეტილების გასაჩივრებას ერთდღიანი ვადა აქვს.

სასამართლოში მოსარჩელეთა შორის იყვნენ „საქართველოს ახალგაზრდა იურისტთა ასოციაცია“; კოალიცია „ჩემი ხმას“ წევრი სამი ორგანიზაცია: „საქართველოს მომავლის აკადემია“, „ღია სივრცე კავკასია“, ,,საერთაშორისო გამჭვირვალობა -საქართველო" და „სამართლიანი არჩევნებისა და დემოკრატიის საერთაშორისო საზოგადოება“ (ISFED).

ISFED–ის იურისტის, თეა თედლიაშვილის განმარტებით, ორგანიზაცია ასპინძის ოლქთან დაკავშირებული გადაწყვეტილების სააპელაციო სასამართლოში გასაჩივრებას არ აპირებს.

„საქართველოს ახალგაზრდა იურისტთა ასოციაციის“ ხელმძღვანელის, ნონა ქურდოვანიძის განცხადებით, ახალციხის და ახალქალაქის რაიონული სასამართლოების გადაწყვეტილებებს გაასაჩივრებენ.

„საერთაშორისო გამჭვირვალობა–საქართველოს“ ახალციხის ოფისის კოორდინატორის, თამუნა უჩიძის ინფორმაციით, სააპელაციო სასამართლოში გასაჩივრებას გეგმავენ „ჩემი ხმას“ წევრი ორგანიზაციებიც.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი