სასამართლომ ნადეჟდა სავჩენკოს 22 წლიანი პატიმრობა მიუსაჯა

2016-03-22 17:49:56, 1054 ნახვა

მსოფლიო

როსტოვის ოლქის დონეცკის სასამართლომ უკრაინელი მფრინავი ნადეჟდა სავჩენკო ორი რუსი ჟურნალისტის მკვლელობაში დამნაშავედ სცნო, - ამის შესახებ ინფორმაციას რუსული მედია ავრცელებს.

როგორც მედია საშუალება იტყობინება, სასამართლომ საბრალდებო აქტი უკვე გამოაცხადა. მას სასამართლომ 22 წლით თავისუფლების აღკვეთა მიუსაჯა.

აღსანიშნავია, რომ თავდაპირველად პროკურატურა სავჩენკოსთვის 23 წლიან პატიმრობას ითხოვდა. მოსამართლეთა კოლეგიამ გადაწყვიტა, რომ სავჩენკო უნდა იყოს საზოგადოებისგან იზოლირებული. ამასთანავე სასამართლომ მას რუსეთის ფედერაციის საჰაერო დარღვევისთვის ჯარიმა დაუწესა.

ვერდიქტის გამოცხადების დროს სავჩენკო უკრაინულ სიმღერას მღეროდა.

შეგახსენებთ, რუსული გამოძიების მტკიცებით, 2014 წლის ივნისში ლუგანსკში მიმდინარე საბრძოლო მოქმედებების დროს სავჩენკომ რუსი ჟურნალისტების ადგილსამყოფელის შესახებ კოორდინატები უკრაინელ სამხედროებს გადასცა, რასაც მათი საარტილერიო შეტევა მოჰყვა. იერიშის შედეგად ორი რუსი კორესპონდენტი დაიღუპა. მას ასევე ბრალი საზღვრის უკანონო გადაკვეთაში ედება.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან