„ეს არის ოკუპაციის გაგრძელება, რომელიც მიმართულია ადამიანების წინააღმდეგ, რამდენადაც გარდა უსაფრთხოებისა,  ქმნის სერიოზულ ჰუმანიტარულ გამოწვევებს“, - ასე გამოეხმაურა მთავრობის სხდომის დასრულების შემდეგ სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი  ოკუპანტების მიერ მორიგი ხნულის გავლებას.

მინისტრის თქმით, ყოველ ჯერზე საფრთხის ქვეშ დგება ადგილობრივი მოსახლეობის მხრიდან საკუთარ მიწებზე წვდომის საკითხი, რაც მათთვის სასიცოცხლოდ მნიშვნელოვანია.

„ის რაც ხდება საოკუპაციო ხაზზე,  ფორთიფიკაცია უკანონო ბარიკადებით, ის პროცესია, რომელიც გრძელდება  2008 წლიდან მოყოლებული. ეს არის ოკუპაციის გაგრძელება, ეს არის ზომა, რომელიც მიმართულია ადამიანების წინააღმდეგ რამდენადაც გარდა უსაფრთხოებისა  ქმნის სერიოზულ ჰუმანიტარულ გამოწვევებს. ყოველ ჯერზე საფრთხის ქვეშ დგება ადგილობრივი მოსახლეობის მხრიდან საკუთარ მიწებზე წვდომის საკითხი, რაც რა თქმა უნდა მათთვის არის სასიცოცხლოდ მნიშვნელოვანი.  ბოლო  პერიოდში ამ პროცესმა მიიღო უკანონო ბანერების აღმართვისა და ე.წ. ხანძარსაწინააღმდეგო ზოლებისა და ხნულების გავლების ფორმა საოკუპაციო ხაზის გასწვრივ.  ამასთან დაკავშირებით უკვე ამოქმედებული გახლავთ ცხელი ხაზი რამდენადაც ნებისმიერი ასეთი ეპიზოდი, რა მასშტაბისაც არ უნდა იყოს, არის დარღვევა საქართველოს ტერიტორიული მთლიანობის და სუვერენიტეტის. ეს არის უკანონო აქტი, რომელიც უხეშად არღვევს საერთაშორისო სამართალს და ძალიან მძიმე გამოწვევას ქმნის ადგილობრივი მოსახლეობისთვის“,-განაცხადა ციხელაშვილმა.

მან მოქმედების სტრატეგიაზე ისაუბრა და აღნიშნა, რომ   რუსეთის მხრიდან მიმდინარე პროცესი მიზანმიმართულ პოლიტიკას ემსახურება.

„რა არის ჩვენი მოქმედების სტრატეგია? პირველ რიგში ჩვენ კარგად უნდა გავაანალიზოთ რას ემსახურება მთლიანად ეს პროცესი. ეს არის ძალიან მიზან მიმართული პოლიტიკა, ოკუპაციის გაგრძელება, იმგვარად, რომ რეგულარული პროვოკაციებით მაქსიმალურად მოხდეს საზოგადოებაში დაძაბული ფონის, პროვოკაციებზე წამოგების მცდელობა, რაც  კიდევ ერთხელ ვაცხადებ რომ არ მოხდება ჩვენი მხრიდან. იმიტომ რომ ჩვენ გვაქვს არჩეული ძალიან მყარი,  თანმიმდევრული, რაციონალურიო კურსი, რომელიც ჩვენი ქვეყნის განვითარებას და კონფლიქტის მშვიდობიან მოგვარებას უკავშირდება. ამიტომ, ჩვენთვის მშვიდობისა და სტაბილურობის შენარჩუნება არის სასიცოცხლოდ მნიშვნელოვანი, მაგრამ სტაბილურობაში ჩვენი ინტერესი არ ნიშნავს არსებული სიტუაციის სტაბილიზაციაში დაინტერესებას. დღეს არსებული სიტუაცია არის მიუღებელი, ქმნის ადამიანების ცხოვრებაში გამოწვევებს და აუცილებელია ნაბიჯების გადადგმა კონფლიქტის მშვიდობიანი მოგვარებისკენ“, - აღნიშნა სახელმწიფო მინისტრმა.

მისივე თქმით, მიმდინარე პროცესების შესახებ  პარტნიორები და საერთაშორისო საზოგადოება ინფორმირებული არიან.

„ჩვენი ძალისხმევა რა თქმა უნდა არის სრულად მობილიზებული. ამ პროცესის შესახებ სრულად არის ინფორმირებული ჩვენი პარტნიორები, საერთაშორისო საზოგადოება და მათი პოზიცია თქვენთვის ცნობილია. გარდა ამისა, ჩვენ გავაგრძელებთ ადგილობრივი მოსახლეობის დახმარებას. ნებისმიერი ინცინდენტი ჩვენთვის არის თანაბრად მნიშვნელოვანი, ყველაფერი რაც ხდება საქართველო-რუსეთის საზღვარს მიღმა  და საქართველოს ტერიტორიის სიღრმეში, რომელ მონაკვეთშიც არ უნდა იყოს, ეს არის აბსოლუტურად უკანონო. ჩვენი რეაქცია არის აბსოლუტურად მკაფიო, მძაფრი და ასეთივე გახლავთ რეაქცია ჩვენი პარტნიორებისა საერთაშორისო თანამეგობრობიდან“,-აღნიშნა მინისტრმა.

შეგახსენებთ, ოკუპანტებმა სოფელ ყარაფილასთან ხნული გაავლეს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ტრამპი: თუ ირანი გარიგებას არ დათანხმდება, ყველა ელექტროსადგურს და ხიდს დავანგრევთ

ბერი ნიკოლოზი (ნარიმანი) გარდაიცვალა

მეუფე იაკობი - ცხვირს არავის არსად არ ჩავაყოფინებთ! კარგად გაითვალისწინოს ყველამ

ქართველი სამხედრო გიორგი კუპარაშვილი, უკრაინის შეიარაღებული ძალების მესამე არმიის კორპუსის პოლკის მეთაურად დაინიშნა