კობა გვენეტაძე მოსახლეობას მოუწოდებს, სავალუტო ჯიხურებში ვალუტის გადაცვლის დროს სიფრთხილე გამოიჩინონ

2017-05-23 12:19:09, 2341 ნახვა

ეკონომიკა საზოგადოება კომენტარი

საქართველოს ეროვნული ბანკის პრეზიდენტის კობა გვენეტაძის განცხადებით, ვალუტის გადამცვლელი პუნქტების შემოწმება გაგრძელდება.

გვენეტაძის თქმით, სავალუტო ჯიხურებში დარღვევები განსაკუთრებით ტურისტულ სეზონზე აქტიურდება.

"არ მინდა, შემოწმებას სეზონური ხასიათი ჰქონდეს, მაგრამ როცა ტურისტული სეზონი აქტიურდება, დარღვევებიც მატულობს. ბათუმში ჩატარებული შემოწმების დროს სხვადასხვა სახის დარღვევები იყო. არსებობს ვალუტის გაცვლის წესები, რომელი მოთხოვნებიც გაცვლითმა კურსებმა უნდა დააკმაყოფილონ, სწორედ ამ წესების შესაბამისობით მოხდა შემოწმება. არსებობს ფულის გათეთრების წინააღმდეგ წესები და კანონის მოთხოვნები, სწორედ აქედან გამომდინარე ხდება სანქციების მიღება", - განაცხადა კობა გვენეტაძემ.

მან მოსახლეობას მოუწოდა, ვალუტის გადამცვლელ პუნქტებთან მიმართებაში მეტი სიფრთხილე გამოიჩინონ.

"საზოგადოებას მოვუწოდებ, შეხედონ რა ტრანზაქციას აკეთებენ და თუ რაიმე ტიპის დარღვევებს ნახავენ, აუცილებლად ეროვნული ბანკის ცხელ ხაზზე შეგვატყობინონ", - განაცხადა გვენეტაძემ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან