ირაკლი კობახიძე: უმრავლესობის გამოსვლა პრეზიდენტის მოხსენებაზე იქნება დამოკიდებული

2017-04-07 12:36:52, 2027 ნახვა

პოლიტიკა კომენტარი

„დაველოდებით პრეზიდენტის მოხსენების შინაარს და ამის საფუძველზე განისაზღვრება საპარლამენტო დებატების შინაარსი“ ,-ამის შესახებ პარლამენტის თავმჯდომარემ ირაკლი კობახიძემ ჟურნალისტებს განუცხადა.

კობახიძის თქმით, პრეზიდენტის მოხსენების წარდგენის წინ, მარგველაშვილთან ძალიან მოკლე შეხვედრა ჰქონდა, სადაც მოხსენების დეტალებზე არ უსაუბრიათ.

„როგორც მოგეხსენებათ, ასეთი გადაწყვეტილება მიღებულია პარლამენტის ბიუროს მიერ და ამ დებატების ფარგლებში გამოვლენ როგორც უმრავლესობის, ასევე ოპოზიციის წარმომადგენლები. იმედია, საინტერესო დისკუსია შედგება. უმრავლესობის გამოსვლა დამოკიდებული იქნება პრეზიდენტის მოხსენებაზე. ბუნებრივია, დებატები პრეზიდენტის მოხსენების გარშემო უნდა აიგოს. პირველ რიგში, მოხსენების შინაარსს დაველოდებით და ამის საფუძველზე საპარლამენტო დებატების შინაარსი განისაზღვრება“, - განაცხადა კობახიძემ.

ცნობისთვის, ამ წუთებში პარლამენტში პრეზიდენტი ყოველწლიური მოხსენებით გამოდის.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან