რუსთაველის თეატრის უნივერსიტეტის პროფესორების ნაწილი - სტუდენტების უმრავლესობა ქუჩაში დგას, დაუშვებელია მათზე ხელის აღმართვა!

2024-12-02 14:56:55, 349 ნახვა

საზოგადოება

ჩვენი სტუდენტების უმრავლესობა ქუჩაში დგას, დაუშვებელია ხელისუფლების მიერ მათზე ხელის აღმართვა! - ამის შესახებ შოთა რუსთაველის თეატრისა და კინოს სახელმწიფო უნივერსიტეტის პროფესორების ნაწილი განცხადებას ავრცელებს.

როგორც განცხადებაშია აღნიშნული, საქართველოს მთავრობის მიერ ევროკავშირთან მოლაპარაკების შეჩერება საქართველოს კონსტიტუციას და საქართველოს მოქალაქეების ურყევ ნებას ეწინააღმდეგება.

„საქართველოს მთავრობის მიერ ევროკავშირთან მოლაპარაკების შეჩერება ეწინააღმდეგება საქართველოს კონსტიტუციას და საქართველოს მოქალაქეების ურყევ ნებას, იცხოვრონ ევროპულ სახელმწიფოში. ბოლო დღეებში ჩვენ არაერთხელ ვიხილეთ, ხელისუფლების მიერ, კონსტიტუციით გარანტირებული პროტესტის უფლების უხეში დარღვევა და მოქალაქეებთან სასტიკი დაპირისპირების შემზარავი ფაქტები.

ჩვენი სტუდენტების უმრავლესობა დღეს დგას ქუჩაში და იბრძვის ევროპული მომავლისთვის.

დაუშვებლად მიგვაჩნია ხელისუფლების მიერ მათზე ხელის აღმართვა!

სოლიდარობას ვუცხადებთ ჩვენი სტუდენტებისა და სრულიად საქართველოს ახალგაზრდობის პროტესტს. ვდგავართ მათთან ერთად ჩვენი საერთო მომავლის დასაცავად“,- აღნიშნულია განცხადებაში.