დავით კირკიტაძის ადვოკატი: იმედია, საქმე სასამართლომდე არ მივა

2015-03-10 14:42:53, 847 ნახვა

სამართალი

„კირკიტაძის ბრალდების სამართლებრივი საფუძველი არ არსებობს“, – ამის შესახებ ქვემო ქართლის ყოფილი გუბერნატორის დავით კირკიტაძის ადვოკატმა გიორგი კონდახაშვილმა განაცხადა.
მან იმედი გამოთქვა, რომ კირკიტაძის საქმე სასამართლომდე არ მივა.
„ჩვენ დაკითხვაზე რა თქმა უნდა გამოვცხადდებით. ჩვენ ჩვენის მხრივ გარკვეული მტკიცებულებები გვაქვს მომზადებული. ყველა კითხვაზე პასუხს გავცემთ და მეტიც, ძალიან დიდი იმედი მაქვს, საქმე სასამართლოს არსებით სხდომამდე არ მივა, რადგან კირკიტაძის ბრალდების არანაირი საფუძველი არ არსებობს“, – აღნიშნა კონდახაშვილმა.
ცნობისთვის, ფინანსთა სამინისტროს საგამოძიებო სამსახური დავით კირკიტაძეს დღეს დაკითხავს.
ამის შესახებ ინფორმაცია დავით კირკიტაძემ „ფეისბუქის“ პირად გვერდზე გაავრცელა.
"ოთხდღიანი ყოყმანის შემდეგ, ფინანსურმა პოლიციამ გადაწყვიტა დღეს 15:00 საათზე, ჩემი დაკითხვაზე დაბარება მაშინ როდესაც ამერიკაში ყოფნის დროს დღეში რამდენიმე უწყება მიჰქონდათ ჩემ საცხოვრებელ მისამართზე. როგორც არ უნდა დასრულდეს დაკითხვის პროცესი, გავაგრძელებ ბრძოლას საქართველოს უკეთესი მომავლისთვის. 21 მარტს, ერთად დავიწყოთ უუნარო ხელისუფლების დასრულების დასაწყისი", - წერს კირკიტაძე.
კირკიტაძეს სახელმწიფო უფლებამოსილების ბოროტად გამოყენებას ედავება. კირკიტაძის სისხლის სამართლის კოდექსის 332-ე მუხლით გათვალისწინებულ დანაშაულს ედავებიან, რაც სამსახურებრივი უფლებამოსილების ბოროტად გამოყენებას გულისხმობს.