18 მილიონი ლარის ოდენობის ინვესტიცია, რამდენიმე საწარმო რაჭაში და 60-მდე დასაქმებული ადამიანი, - ეს კომპანია „ბლაუენშტაინ საქართველოს" საქმიანობის ანგარიშია, რომლის პრეზენტაციას დღეს საქართველოს პრემიერ-მინისტრი გიორგი კვირიკაშვილი  დაესწრო.

მთავრობის ადმინისტრაციის პრესსამსახურის ინფორმაციით, „ბლაუენშტაინ საქართველოს" სათავო ფერმა რაჭის რეგიონში, სოფელ შარდომეთში მდებარეობს. მესაქონლეობის დარგში ერთ-ერთი მოწინავე კომპანია, შვეიცარიელ პარტნიორებთან თანამშრომლობით, აწარმოებს ნატურალურ და ხარისხიან პროდუქციას ევროპული სტანდარტების დაცვით.

პრემიერმა კომპანიის დამფუძნებლებს, მაქს ბლაუენშტაინსა და ირაკლი კერვალიშვილს წარმატებული საქმიანობისთვის მადლობა გადაუხადა და აღნიშნა, რომ მთავრობის მოტივაციაა, პროექტი კიდევ უფრო განვითარდეს.

„ვფიქრობ, ამ პროექტის პოტენციალი ასმაგია. ის საპილოტო მოდელი, რომელიც დაინერგა საქართველოში, ყველაზე თავსებადია ქართული სასოფლო-სამეურნეო წარმოების კულტურასთან და პროექტში ჩართული თითოეული ადამიანის მოტივაციასთან. როდესაც ჩვენ პირველად შევხვდით 2013 წელს და თქვენ ეს პროექტი წარმოადგინეთ, მივხვდით, რომ ეს არის მოდელი, რომელიც წვრილ მეწარმეს უნარჩუნებს მესაკუთრის ამბიციას და ამავე დროს იძლევა საშუალებას, დაინერგოს საუკეთესო ევროპული ტექნოლოგიები საქართველოში", - განაცხადა პრემიერ-მინისტრმა.

გიორგი კვირიკაშვილის თქმით, პროექტი ასევე ქმნის დაფინანსების საშუალებას და მასშტაბის ეკონომიას, რაც კომპანიის მიერ წარმოებული პროდუქციის კონკურენტუნარიანობას უზრუნველყოფს.

პრემიერმა აღნიშნა, რომ ეს არის მოდელი, რომელიც შეიძლება, საქართველოს ყველა რეგიონზე გავრცელდეს და კომპანიის დამფუძნებლებს ამ მიმართულებით მთავრობის მაქსიმალური მხარდაჭერის პირობა მისცა.

„მთავრობის პროგრამები, ოთხპუნქტიანი რეფორმების გეგმა ძალიან მნიშვნელოვანია, მაგრამ ყველაზე მნიშვნელოვანია ის, რასაც თქვენ აკეთებთ და ამისთვის, მინდა, უბრალოდ მადლობა გადაგიხადოთ", - მიმართა პრემიერ-მინისტრმა „ბლაუენშტაინ საქართველოს" დამფუძნებლებს.

„ბლაუენშტაინ საქართველო" უახლოესი 2-3 წლის მანძილზე დამატებით 20 ფერმის შექმნას, ახალი მაღაზიების გახსნას და მერძეული ფერმების განვითარებას გეგმავს. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ბულგარეთის ყოფილი პრეზიდენტი რუმენ რადევი საპარლამენტო არჩევნებში ლიდერობს

ჰორმუზის სრუტეში აშშ-მ ირანის კუთვნილი ტანკერი დააკავა, ირანმა სამხედრო გემებზე დრონებით თავდასხმა განახორციელა

უკრაინამ ერთ კვირაში მეორედ დაარტყა რუსეთის ერთადერთ ნავთობგადამამუშავებელ ქარხანას შავ ზღვაზე, ერთი ადამიანი დაიღუპა.

ღმერთია და ექიმი არ სჭირდებაო - ნარიმან მაქარაშვილთან, მისი თაყვანისმცემლები ექიმს არ უშვებდნენ -ვიდეო