დავით ნარმანია: ე.წ. ხრუშჩოვკების პროექტის განხორციელება დაწყებულია

2015-04-23 14:31:44, 352 ნახვა

პოლიტიკა

თბილისის მერის, დავით ნარმანიას ინფორმაციით, ე.წ. ხრუშჩოვკების პროექტის განხორციელება დაწყებულია.
მისი განცხადებით, ე.წ. ხრუშჩოვკების და ნგრევის პირას მყოფი სახლების პრობლემას თბილისის მერია უბნების მიხედვით, ინდივიდუალურ რეჟიმში უდგება.
"ჩვენ ვანვითარებთ ამ პროექტს ინდივიდუალურად უბნების მიხედვით, სადაც მოთხოვნა არსებობს კერძო სექტორის მხრიდან. ეს ეხება არა მხოლოდ "ხრუშჩოვკების" პროექტს, არამედ ძველი ნგრევის პირას მყოფი სახლების პროექტებს, სადაც გაზრდილი კოეფიციენტი მიეცემა ჩვენი მხრიდან მშენებელ კომპანიებს და ისინი ავითარებენ ამ პროექტებს. რამდენიმე ასეთი წინადადება ჩვენთან იყო შემოსული, განვიხილეთ და მწვანე შუქი მივეცით, რამდენიმე მათგანი ახლაც მოლაპარებისა და განხილვის სტადიაზეა. ასე რომ, ინდივიდუალურ რეჟიმში ვუდგებით უბნების მიხედვით ამ პრობლემას", - განაცხადა ნარმანიამ.
მისივე თქმით, წინასაარჩევნო მინიმალური დაპირება იყო, რომ 50 სახლზე მეტი ე.წ. ხრუშჩოვკისა და ავარიული სახლის ჩანაცვლება მოხდებოდა. ნარმანიას ინფორმაციით, 10-მდე პროექტი უკვე განხილულია და ზოგიერთ მათგანს უკვე მიეცა მშენებლობის ნებართვა.
შეგახსენებთ, ჯერ კიდევ გასული წლის მარტში საკრებულოს ყოფილმა თავმჯდომარემ ირაკლი შიხიაშვილმა არაბ ინვესტორებთან თბილისში ე.წ. ხრუშჩოვკების დემონტაჟის შესახებ მემორანდუმი გააფორმა. თუმცა პროექტის განხორციელება არ დაწყებულა. დავით ნარმანიამ კი მერად არჩევის შემდეგ საკრებულოს გაერთიანებული კომისიების სხდომაზე განაცხადა, რომ დედაქალაქში ე.წ. ხრუშჩოვკების ნაწილის განახლება მოხდებოდა.