უკრაინის მთავრობამ ოდესის საოლქო ადმინისტრაციის ხელმძღვანელის თანამდებობაზე სახელმწიფო საწარმოს, პოლიგრაფიული კომბინატის "უკრაინას" დირექტორის, მაქსიმ სტეპანოვის კანდიდატურას მხარი დაუჭირა, - ამის შესახებ უკრაინული მედია იუწყება.

მედიის ინფორმაციით, შესაბამისი გადაწყვეტილება მინისტრთა კაბინეტის სხდომაზე მიიღეს.

შეგახსენებთ, რომ მიხეილ სააკაშვილმა ოდესის საოლქო ადმინისტრაციის ხელმძღვანელის თანამდებობის დატოვების შესახებ 7 ნოემბერს განაცხადა. მან უკრაინის ხელისუფლება კორუფციაში დაადანაშაულა და ვადამდელი საპარლამენტო არჩევნების დანიშვნა მოითხოვა. სააკაშვილის გადადგომა პრეზიდენტმა პეტრო პოროშენკომ 9 ნოემბერს დააკმაყოფილა.

მოგვიანებით მთავრობამ ვაკანტურ თანამდებობაზე კონკურსი გამოაცხადა, რომელშიც მაქსიმ სტეპანოვმა გაიმარჯვა.

ცნობისთვის, მაქსიმ სტეპანოვი 39 წლისაა. 1999-2001 წლებში ის “ნაფტოგაზ უკრაინის” შვილობილი კომპანიის გენერალური დირექტორის მოადგილე იყო. 2003-2004 წლებში უკრაინის სახელმწიფო საგადასახადო ადმინისტრაციის თავმჯდომარის მოადგილის თანამდებობას იკავებდა. 2008-2010 წლებში სტეპანოვი ოდესის ოლქის გუბერნატორის ნიკოლაი სერდიუკოვის  პირველ მოადგილედ მუშაობდა. იანუკოვიჩის გაპრეზიდენტების შემდეგ ის სერდიუკოვთან ერთად თანამდებობიდან გაათავისუფლეს.

პოლიგრაფიული კომბინატის “უკრაინას” დირექტორად სტეპანოვი 2011 წლის დეკემბრიდან მუშაობს. უკრაინული მედიის ინფორმაციით, მაქსიმ სტეპანოვს აქვს საერთო ბიზნესი ლეონიდ იურუშევიჩთან, რომელიც არსენი იაცენიუკის საარჩევნო კამპანიას აფინანსებდა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ტრამპი: თუ ირანი გარიგებას არ დათანხმდება, ყველა ელექტროსადგურს და ხიდს დავანგრევთ

ბერი ნიკოლოზი (ნარიმანი) გარდაიცვალა

მეუფე იაკობი - ცხვირს არავის არსად არ ჩავაყოფინებთ! კარგად გაითვალისწინოს ყველამ

ქართველი სამხედრო გიორგი კუპარაშვილი, უკრაინის შეიარაღებული ძალების მესამე არმიის კორპუსის პოლკის მეთაურად დაინიშნა