დამასკოში ორი აფეთქება მოხდა

2016-06-11 13:28:17, 1144 ნახვა

მსოფლიო

სირიის ქალაქ დამასკოში ორი აფეთქება მოხდა, რის შედეგადაც 2 ადამიანი გარდაიცვალა, - ამის შესახებ BBC იუწყება.

მედიის იფნორმაციით, ტერორისტებმა ჯერ ავტომანქანა ააფეთქეს, შემდეგ კი თავი თვითმკვლელმა ტერორისტმა აიფეთქა. წინასწარი ინფორმაციით ათობით ადამიანი დაშავდა.

როგორც მედია საშუალება წერს, აფეთქება ქალაქის ჩრდილოეთ ნაწილში შიიტურ რაიონში მოხდა.

ცნობისთვის, აფეთქებაზე პასუხისმგებლობა „ისლამურმა სახელწმიფომ“ აიღო.

ამასთან, BBC სირიაში კიდევ ერთი ინციდენტის შესახებ იუწყება.

მედიის ინფორმაციით, სირიის სამთავრობო ძალებმა დამასკოს ალყაში მოქცეული რაიონი ჯანდაცვის მსოფლიო ორგანიზაციის ჰუმანიტარული ტვირთის მიღებიდან რამდენიმე საათში დაბომბეს.

BBC-ის ცნობით, ავიაციამ დარაიაში 28 ჭურვი ჩამოაგდო, რამაც მოსახლეობისთვის დახმარების დარიგებას ხელი შეუშალა.

ცნობისთვის, მედიკამენტები და საკვები დარაიაში 2012 წლის შემდეგ პირველად ჩაიტანეს.

პარალელურად, სირიის ოპოზიციური ძალები ავრცელებენ ცნობას, რომ ქვეყნის ჩრდილოეთით ალყაში მოაქციეს „ისლამური სახელმწიფოს“ მიერ კონტროლირებადი ქალაქი. მათ ისლამისტებს მანბიჯისკენ მიმავალი უკანასკნელი გზა ჩაუკეტეს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან