“გირჩის” ერთ-ერთი ლიდერი, ეკონომისტი სანდრო რაქვიაშვილი მაღაზიებში სურსათის ფასების საკითხთან დაკავშირებით ირაკლი კობახიძეს დებატებში იწვევს.

ირაკლი კობახიძემ რამდენიმე დღის წინ გამოაქვეყნა ვიდეო, რომლითაც სურსათის ფასების ზრდა მაღაზიებში სუპერმარკეტებისა და დისტრიბუტორების ქსელებს გადააბრალა. ამის შემდეგ პარლამენტმა შექმნა კომისია ამ საკითხის შესასწავლად, ხოლო სუს-მა მოკვლევა დაიწყო.

სანდრო რაქვიაშვილი აცხადებს, რომ გადაამოწმა კობახიძის მიერ დასახელებული რიცხვები და მივიდა დასკვნამდე, რომ ვიდეო, რომელიც მთავრობამ გამოაქვეყნა, ტყუილზეა აგებული.

“გარდა არაკომპეტენტურობისა, პრემიერის ვიდეო უბრალოდ ტყუილზეა აგებული. საკვანძო მომენტში, ის იტყუება, როცა ამტკიცებს, ვითომ ქართული სავაჭრო ქსელების მომგებიანობა (როგორც თვითონ ეძახის “წმინდა მოგების მარჟა”) მნიშვნელოვნად აღემატება ევროპული ქსელების მომგებიანობას.

2024 წლის მონაცემებით, და ეს მონაცემები საჯაროა და მარტივად შეგიძლიათ გადაამოწმოთ, საქართველოში ყველაზე მსხვილი ქსელებისთვის ეს მაჩვენებელი მერყეობს -7.2%-დან +8%-მდე, ევროპაში კი -3.8%-დან +5.1%-მდე. ამ ქსელების საშუალო შეწონილი კი ჩვენთან 0.2%-ია, როცა ევროპაში საშუალო მაჩვენებელი 2%-ია, ანუ შეიძლება ითქვას, რომ ამ პარამეტრით საქართველოს ქსელური მაღაზიების მომგებიანობა არათუ არ აღემატება, არამედ პირიქით, ნაკლებიც კი არის, ვიდრე ევროპაში.

ასევე, არანაკლებ საინტერესოა, რომ პრემიერი ამ მაჩვენებელს (“წმინდა მოგების მარჟა”) უადგილოდ იყენებს, რადგან მხოლოდ ამ პარამეტრით კომპანიების შედარება აზრმოკლებულია: ის მნიშვნელოვნად იცვლება საგადასახადო სისტემის სპეციფიკისა თუ ინვესტიციური სტრატეგიის ან სხვა ფაქტორების გავლენის ქვეშ. ერთი და იგივე კომპანიისთვის ერთ წელს ეს მაჩვენებელი შეიძლება მაღალი იყოს, მეორე წელს კი დაბალი.

ჰოდა, ირაკლი კობახიძე 1 წლის წინ მიუხედავად საჯაროდ გამოხატული მზაობისა, იაგოსთან არჩევნებზე დებატებს გაექეცით. ახლა კი მე გთავაზობთ ამ თემაზე დებატებს. ვიცი, რომ ეკონომიკა თქვენი სპეციალიზაცია არაა, მაგრამ ენდობით თუ არა იმ მრჩევლებს, ვინც ეს ვიდეო ჩაგაწერინათ და შეძლებთ თუ არა ამ პოზიციის საჯაროდ დაცვას? მივიჩნევ, რომ ამ ვიდეოში გავრცელებული იდეები არათუ მცდარი, არამედ საშიშიც კი არის ქვეყნისთვის. ასე რომ, მოდით საჯაროდ ვილაპარაკოთ და ხალხმა გადაწყვიტოს, ვინ არის მართალი”, – აცხადებს რაქვიაშვილი.

ავტორი: ექსპრესნიუსი,

სოციალური ქსელები

NASA-ს ასტრონავტები დედამიწაზე 50 წელზე მეტი ხნის შემდეგ მთვარის ზედაპირზე პირველი დაშვების შემდეგ დაბრუნდნენ

უკრაინის მთავარმა მომლაპარაკებელმა „უზარმაზარი პროგრესის“ შესახებ განაცხადა და პუტინთან შეთანხმების მიღწევის შესაძლებლობა არ გამორიცხა

რესპუბლიკელებმა დაბლოკეს ირანთან ომთან დაკავშირებით ტრამპის უფლებამოსილების შეზღუდვის მცდელობა

რუსეთის ხელისუფლებამ სტენფორდის უნივერსიტეტი „არასასურველ ორგანიზაციად“ გამოაცხადა