უშიშროების საბჭომ ჯარში სავალდებულო გაწვევის გაუქმებაზე ხიდაშელის ბრძანება გამოითხოვა

2016-06-27 14:18:36, 672 ნახვა

სამხედრო

საქართველოს ეროვნული უშიშროების საბჭოს აპარატს სამხედრო სავალდებულო სამსახურის გაუქმების შესახებ ჯერ რაიმე ოფიციალური დოკუმენტი არ მიუღია და თავდაცვის მინისტრის ბრძანების თაობაზე მხოლოდ მინისტრის განცხადების დონეზე არიან ინფორმირებული.

როგორც უშიშროების საბჭოს აპარატში აცხადებენ, უშიშროების საბჭოს მდივანმა შესაბამისი ბრძანება გასაცნობად თავდაცვის სამინისტროდან უკვე გამოითხოვა. კომენტარი კი, საჭიროების შემთხვევაში, დოკუმენტის გაცნობის შემდეგ გაკეთდება.

შეგახსენებთ, რომ საქართველოს თავდაცვის მინისტრმა, თინა ხიდაშელმა ხელი მოაწერა ბრძანებას, რომლის მიხედვითაც სამხედრო სამსახური სავალდებულო აღარ იქნება.

ბრძანებას თინა ხიდაშელმა დღეს, ჟურნალისტების თანდასწრებით მოაწერა ხელი.

მისივე თქმით, თავდაცვის მომდევნო მინისტრებს, შეუძლიათ, ეს ბრძანება გააუქმონ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან