ქაშუეთში დაღუპული პოლიციელის ბექა მარგიშვილის ცხედარი მიასვენეს

2015-04-09 12:41:54, 531 ნახვა

საზოგადოება

ქაშეთის წმინდა გიორგის სახელობის ტაძარში დაღუპული პოლიციელის ბექა მარგიშვილის ცხედარი მიასვენეს, სადაც მისი სამოქალაქო პანაშვიდი უნდა გაიმართოს.

ტაძართან იმყოფებიან სასჯელაღსრულებისა და პრობაციის მინისტრი გიორგი მღებრიშვილი, დედაქალაქის მერი დავით ნარმანია, საპარლამენტო უმრავლესობისა და პარტია „თავისუფალი დემოკრატების“ წევრები.

ქაშუეთის ტაძარში პრემიერ–მინისტრი ირაკლი ღარიბაშვილიც აპირებს მისვლას.

შეგახსენებთ, შსს-ს ისანი-სამგორის სამმართველოს მე-8 განყოფილების უბნის ინსპექტორ-გამომძიებელი ბექა მარგიშვილი დეტექტივის თანაშემწე - გამომძიებელ ვალერიან გრძელიშვილთან ერთად 4 აპრილს, საღამოს საათებში, თბილისში, ვარკეთილის მეტროსთან, ჯავახეთის ქუჩაზე, სამსახურებრივ მოვალეობას ასრულებდა, რა დროსაც მათ გადამოწმების მიზნით პიროვნება შეაჩერეს. აღნიშნულმა პირმა მოულოდნელად პოლიციელების მისამართით ცეცხლსასროლი იარაღიდან ცეცხლი გახსნა და შემთხვევის ადგილიდან მიიმალა. სროლის შედეგად ორივე სამართალდამცველი დაიჭრა. მიყენებული ჭრილობების შედეგად ბექა მარგიშვილი საუნივერსიტეტო კლინიკაში გადაყვანის შემდეგ გარდაიცვალა.
მოგვიანებით, პროკურატურამ პოლიციელის მკვლელობის ჩამდენი პირის ფოტო გამოაქვეყნა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან