პროკურორ მარიამ ბერძენიშვილის განცხადებით, გრიგოლ ლილუაშვილს ამ ეტაპზე გამოძიებისთვის რაიმე სახის ინფორმაცია არ მიუწოდებია. მისივე თქმით, სუს-ის ყოფილი უფროსის საქმეზე სასამართლო პროცესი დაიხურა, რათა გამოძიების დასრულებამდე არ გამჟღავნდეს კონკრეტული დეტალები და არ შეეშალოს ხელი საგამოძიებო მოქმედებების სრულყოფილად ჩატარებას.

პროკურორის განმარტებით, საქმეში ქრთამის აღების რამდენიმე ეპიზოდია, მათ შორის თაღლითური „ქოლ-ცენტრების“ მფარველობის საკითხი, რაც კომპლექსურ დანაშაულს წარმოადგენს და ამ მიმართულებით გამოძიება აქტიურად მიმდინარეობს. ბერძენიშვილმა აღნიშნა, რომ გამოძიების დასრულების შემდეგ პროკურატურა საზოგადოებას ყველა დეტალს სრულად მიაწვდის.

"იმის გათვალისწინებით, რომ საქმე არის საკმაოდ სენსიტიური, მრავალი დეტალი იკვეთება და გამოძიება მუშაობს მრავალ დეტალზე. მე მესმის, რომ არის საზოგადოების უდიდესი ინტერესი

[...] თუმცა, იმის გათვალისწინებით, რომ ძალიან ბევრი დეტალი არის დასადგენი, საკმაოდ აქტიურ ფაზაში ვართ და ვმუშაობთ. აქედან გამომდინარე, ბრალდების მხარე მიზანშეწონილად მიიჩნევს, გამოძიების დასრულებამდე არ გამჟღავნდეს კონკრეტული დეტალები, რათა გამოძიებას მიეცეს საშუალება სრულყოფილად ჩაატაროს ყველა საგამოძიებო მოქმედება. არ მოხდეს რომელიმე პირზე სხვადასხვა ფორმით და გარემოებით ზეწოლა და რა თქმა უნდა, ეს არის საზოგადოების ინტერესიც. [...] ამიტომ მოვითხოვეთ პროცესის დახურვა.

[...] ქრთამის აღების რამდენიმე ეპიზოდი არის, მათ შორის, თაღლითური ქოლ-ცენტრების მფარველობის საკითხი, რაც, ბუნებრივია, იწვევს დიდ ინტერესს. ეს არის საკმაოდ კომპლექსური ხასიათის დანაშაული. [...] გამოკითხული არიან შემხებლობაში მყოფი პირები. ამ საქმეში მოიპოვება მათ შორის პირდაპირი ხასიათის მტკიცებულებები, რასაც თქვენ მამხილებელს უწოდებთ. [...] ამ საქმეში კონკრეტული პირები, ვინ არიან გამოკითხული, ვერ გიპასუხებთ ჯერჯერობით.

გრიგოლ ლილუაშვილს ამ ეტაპისთვის გამოძიებისთვის რაიმე სახის ინფორმაცია მოწოდებული არ აქვს.

გამოძიება დაახლოებით 2 თვეა მიმდინარეობს. იმის გათვალისწინებით, რომ ამ საქმეზე შეიქმნა დასაბუთებული ვარაუდის სტანდარტი, რომ ბრალდებულმა გრიგოლ ლილუაშვილმა ჩაიდინა ბრალად წარდგენილი ქმედებები, მხოლოდ ამის შემდეგ დაიწყო მის მიმართ სისხლისსამართლებრივი დევნა". - თქვა ბერძენიშვილმა.

ავტორი: ექსპრესნიუსი,

სოციალური ქსელები

ირანმა აშშ დაადანაშაულა ცეცხლის შეწყვეტის რეჟიმის დარღვევაში და უარი თქვა მოლაპარაკებების ახალ რაუნდზე

ბულგარეთის ყოფილი პრეზიდენტი რუმენ რადევი საპარლამენტო არჩევნებში ლიდერობს

ჰორმუზის სრუტეში აშშ-მ ირანის კუთვნილი ტანკერი დააკავა, ირანმა სამხედრო გემებზე დრონებით თავდასხმა განახორციელა

უკრაინამ ერთ კვირაში მეორედ დაარტყა რუსეთის ერთადერთ ნავთობგადამამუშავებელ ქარხანას შავ ზღვაზე, ერთი ადამიანი დაიღუპა.