მიხეილ სააკაშვილი: ჟვანიას ცხედარს ექსჰუმაცია გაუკეთონ

2015-02-17 23:36:00, 574 ნახვა

სამართალი

„გაუკეთონ ჟვანიას ცხედარს ექსჰუმაცია და 2 წუთში დამტკიცდება, რომ დენით (გაზით) გარდაიცვალა“, – ამის შესახებ საქართველოს ყოფილმა პრეზიდენტმა მიხეილ სააკაშვილმა „არჩევანში“ განაცხადა.
მისი თქმით ყოფილი პრემიერი ზურაბ ჟვანია გაზით მოწამვლის შედეგად დაიღუპა, რაც იმ დროს საქართველოში ჩვეულებრივი მოვლენა იყო.
„მე მიმაჩნია, რომ ზურაბ ჟვანია გაზით მოწამვლის შედეგად დაიღუპა. იმ დროს თბილისში ყოველწლიურად გაზის მოწამვლით 200–300 ადამიანი იღუპებოდა. ეს იყო ჩვეულებრივი ბინა. მაშინ ამბობდნენ, რომ პრემიერ–მინსტრს ეს როგორ შეიძლებოდა დამართნოდა, პრემიერი ძალიან ჩვეულებრივი ცხოვრებით ცხოვრობდა, არ ქონდა არც მდიდრული აპარტამენტი. ეს რომ მოხდა, დედაჩემს ზუსტად ასეთი გაზის გამათბობელი ჰქონდა და სასწრაფოდ გამოვაცვლევინე. ყველანი ასეთ პირობებში ვიყავით მაშინ, მაგრამ ამას არ ქონდა საქმე მის პირად ცხოვრებასთან, მე არასდროს არ მაინტერესებდა ზურას პირადი ცხოვრება. ჩემს პირად ცხოვრებაზეც ასეთი თავდასხმა იყო. მე ბოლო მიტინგი ასლან აბაშიძემ მომიწყო ლოზუნგით „ძირს ცისფერი სააკაშვილი“. მე ასეთ თემებზე საუბრის ალერგია მაქვს. ამიტომ, არასდროს არ აქვს მნიშვნელობა ზურას პირად ცხოვრებას“, – აღნიშნა სააკაშვილმა.
ექს–პრეზიდენტის მტკიცებით, ყოფილ ხელისუფლებას FBI არ მოუწვევია. ის თავად ჩამოვიდა და დასკვნა დაწერა.
რაც შეეხება ჟვანიას გარდაცვალებაზე FBI–ის დასკვნის არ გასაჯაროვებას, სააკაშვილის თქმით, ეს მისი სურვილით მოხდა.
„ეს დასკვნა რატომ არ გამოქვეყნდა – ამაზე ბევრი კამათი გვქონდა. ჩემი გადაწყვეტილება იყო, რომ დასკვნა არ უნდა გამოგვექყნებულიყო. მე ზურაბ ჟვანიას წინაშე ვალდებულება მქონდა, რომელიც პირნათლად შევასრულე. ადამიანის პირადი ცხოვრება ხელშეუხებელი უნდა იყოს. მე ამაზე საშინელი გართულება მაქვს. მიმაჩნდა, პატარა დეტალების გასაჯაროვება, საზოგადოების მიმართ უპატივცემულობა იქნებოდა და დღესაც ასე მიმაჩნია. გამოიძიონ, გაკეთონ ექსჰუმაცია და 2 წუთში დადგინდება, რომ დენით (გაზით) გარდაიცვალა“, – განაცხადა სააკაშვილმა.