იანოშ ჰერმანი: ასეთი შეთანხმებები კრიზისის დარეგულირებას არ ეხმარება

2015-02-18 12:59:08, 323 ნახვა

პოლიტიკა

"ასეთი შეთანხმებები კრიზისის დარეგულირებას არ ეხმარება",-ასე გამოეხმაურა ევროკავშირის ელჩი საქართველოში იანოშ ჰერმანი რუსეთსა და სამხრეთ ოსეთს შორის დღეს დაგეგმილ ე.წ. სახელმწიფო საზღვრის შესახებ ხელშეკრულების გაფორმებას.
მისივე თქმით, ევროკავშირი მიმდინარე მოვლენებს ყურადღებით აკვირდება.
"რათქმა უნდა, ყურადღებით ვადევნებთ თვალს მიმდინარე მოვლენებს, ე.წ. ხელშეკრულებას რუსეთსა და აფხაზეთს შორის და ასევე შესაძლო ხელშეკრულებას რუსეთსა და ცხინვალს შორის. ერთმნიშვნელოვნად შემიძლია ვთქვა, რომ ასეთი შეთანხმებები კრიზისის დარეგულირებას არ ეხმარება",-განაცხადა იანოშ ჰერმანმა.
ცნობისთვის, ოკუპირებულ ცხინვალის რეგიონთან რუსეთი დღეს ე.წ. სახელმწიფო საზღვრის შესახებ ხელშეკრულებას გააფორმებს.
ამის შესახებ რუსეთის საგარეო საქმეთა სამინისტროს მიერ ოფიციალურ გვერდზე გავრცელებულ სპეციალურ განცხადებაშია საუბარი.
მათივე ცნობით, შეხვედრაზე რუსეთის საგარეო საქმეთა მინისტრი სერგეი ლავროვი და სამხრეთ ოსეთის ოკუპირებული რეგიონის ე.წ. ხელისუფლების საგარეო საქმეთა მინისტრი დავით სანაკოევი სამომავლოდ სტრატეგიული თანამშრომლობისა და ინტეგრაციის შესახებ შეთანხმების გაფორმებაზეც იმსჯელებენ.