ვახტანგ გომელაური: პოლიციელის სავარაუდო მკვლელმა, სამართალდამცველებს ცეცხლი დღესაც გაუხსნა

2015-04-05 16:25:41, 723 ნახვა

სამართალი

შინაგან საქმეთა მინისტრ ვახტანგ გომელაურის ინფორმაციით, უბნის ინსპექტორ ბექა მარგიშვილის სავარაუდო მკვლელმა პოლიციის თანამშრომლებს ცეცხლი დღესაც გაუხსნა.

,,პოლიციელებმა პიროვნებას მოუწოდეს შესაჩერებლად, არ შეჩერდა და ცეცხლი გახსნა, რომელსაც პარიკი ეკეთა. სავარაუდოდ, ეს ის პიროვნებაა, რომელმაც გუშინ ერთი პოლიციელი მოკლა, მეორე კი დაჭრა. პარიკი დააგდო და პოლიციელებს ცეცხლი გაუხსნა. საბედნიეროდ, არც ერთი პოლიციელი არ დაზიანდა“,-განაცხადა ვახტანგ გომელაურმა.

ეს განცხადება ვახტანგ გომელაურმა პირველ კლინიკურ საავადმყოფოში გააკეთა, სადაც დაჭრილი პოლიციის თანამშრომელი ვალერიან გრძელიშვილი მოინახულა.

შეგახსენებთ, შსს-ს ისანი-სამგორის სამმართველოს მე-8 განყოფილების უბნის ინსპექტორ-გამომძიებელი ბექა მარგიშვილი დეტექტივის თანაშემწე - გამომძიებელ ვალერიან გრძელიშვილთან ერთად 4 აპრილს, საღამოს საათებში, თბილისში, ვარკეთილის მეტროსთან, სამსახურებრივი მოვალეობის შესრულების დროს ფიზიკურმა პირმა ცეცხლსასროლი იარაღით დაჭრა.

ბექა მარგიშვილი მიყენებული ჭრილობების შედეგად, კლინიკაში გადაყვანის შემდეგ გარდაიცვალა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან