თეა წულუკიანი: იარაღის კანონიერად შეძენის წესები უნდა გამკაცრდეს

2015-04-07 17:17:39, 357 ნახვა

პოლიტიკა

იუსტიციის მინისტრი თეა წულუკიანი პარლამენტს მოუწოდებს, „იარაღის შესახებ“ კანონპროექტს მხარი დაუჭიროს.
მან ეს განცხადება პოლიციელის მკვლელობასთან დაკავშირებით გააკეთა.
მისივე თქმით, აღნიშნული კანონპროექტი იარაღის კანონიერად შეძენას გაართულებს, რაც დანაშაულთან ბრძოლის ერთ–ერთი მექანიზმი იქნება.
„ჩვენს ქვეყანაში აკრძალულია იარაღის უკანონო ტარება, შენახვა, შეძენა და გამოყენება, მაგრამ ასევე კანონიერად შეძენის წესები უნდა გამკაცრდეს. მე კიდევ ერთხელ მინდა მოვუწოდო პარლამენტს, რომ დააჩქარონ იმ კანონის მიღება, რომელიც აძნელებს კანონიერ წვდომას იარაღზე. ჩვენ ეს უნდა ვაქციოთ დანაშაულთან ბრძოლის ერთ–ერთ რიგით, მაგრამ მნიშვნელოვან მექანიზმად“, – აღნიშნა წულუკიანმა.
შეგახსენებთ, შსს-ს ისანი-სამგორის სამმართველოს მე-8 განყოფილების უბნის ინსპექტორ-გამომძიებელი ბექა მარგიშვილი და დეტექტივის თანაშემწე - გამომძიებელი ვალერიან გრძელიშვილი 4 აპრილს, საღამოს საათებში, თბილისში, ვარკეთილის მეტროსთან, ჯავახეთის ქუჩაზე, სამსახურებრივ მოვალეობას ასრულებდნენ, რა დროსაც მათ გადამოწმების მიზნით შალვა აბულაძე შეაჩერეს. შალვა აბულაძემ მოულოდნელად პოლიციელების მისამართით ცეცხლსასროლი იარაღიდან ცეცხლი გახსნა და შემთხვევის ადგილიდან მიიმალა. სროლის შედეგად ორივე სამართალდამცველი დაიჭრა. მიყენებული ჭრილობების შედეგად ბექა მარგიშვილი საუნივერსიტეტო კლინიკაში გადაყვანის შემდეგ გარდაიცვალა. ვალერიან გრძელიშვილს სამედიცინო დახმარება პირველ კლინიკურ საავადმყოფოში უტარდება. მიმდინარეობს ოპერატიულ-სამძებრო და საგამოძიებო ღონისძიებები შალვა აბულაძის დაკავების მიზნით. გამოძიებას ქალაქ თბილისის პროკურატურა აწარმოებს.