ფინანსთა სამინისტრო ბიზნეს ასოციაციებთან შეხვედრებს განაგრძობს.

სამინისტროს ინფორმაციით, მოგების გადასახადის რეფორმისა და საგადასახადო ადმინისტრირების გამარტივების მიმართულებით დაგეგმილ ღონისძიებებს დღეს დამსაქმებელთა ასოციაციის წარმომადგენლები გაეცნენ.

უწყების ცნობით, ასოციაციის წარმომადგენლები დეტალურად გაეცნენ მოგების გადასახადის რეფორმასთან დაკავშირებულ ტექნიკურ და ადმინისტრაციულ საკითხებს, მისი განხორციელების შემთხვევაში, მოსალოდნელ საფინანსო-ეკონომიკურ შედეგებს. შეხვედრაზე, ასევე, საუბარი შეეხო საგადასახადო ადმინისტრირების გამარტივების მიმართულებით დაგეგმილ სიახლეებს, მათ შორის, ძირითადი საშუალებების იმპორტის დღგ-სგან განთავისუფლების, აღიარებული დავალიანებების ჩამოწერისა და დავის პერიოდში საბანკო ანგარიშზე ყადაღის დადების საკითხებს.

 როგორც ფინანსთა მინისტრმა ნოდარ ხადურმა განაცხადა, მნიშვნელოვანია ახალი კანონპროექტის განხილვის პერიოდში გათვალისწინებული იყოს ბიზნესის წინადადებები და შენიშვნები.

„თქვენთვის ცნობილია, რომ საქართველოში ძალიან სერიოზული რეფორმა იწყება. საქართველოს პარლამენტს უკვე წარედგინა მთავრობის წინადადება - პრემიერ-მინისტრის ინიციატივით მოგების გადასახადის მაგივრად, საქართველოში იქნება განაწილებული მოგების გადასახადი. აღნიშნული რეფორმის შედეგად, ეკონომიკაში დარჩება მეტი თანხები რეინვესტირებისთვის, განვითარებისთვის და ქვეყნის ეკონომიკას ექნება უფრო მეტი შესაძლებლობები. დაგეგმილია ასევე ცვლილებები საგადასახადო ადმინისტრირების გამარტივების მიმართულებით. ეს არის გადაწყვეტილებები, რომლებიც მიმართულია ბიზნეს გარემოს კიდევ უფრო გაუმჯობესებისთვის. ფინანსთა სამინისტრო მზადაა, ასეთ რეჟიმში გააგრძელოს კომუნიკაცია ბიზნესთან. ჩვენ გვექნება შეხვედრები სხვა ასოციაციებთან და მათაც მივაწვდით ინფორმაციას აღნიშნული რეფორმის თაობაზე. მოვისმენთ ბიზნესის წინადადებებსა და მოსაზრებებს და თუ ვნახავთ, რომ არის გარკვეული ხარვეზები, ჩვენ ამ ხარვეზებს გავასწორებთ“, - განაცხადა ფინანსთა მინისტრმა, ნოდარ ხადურმა.

 დამსაქმებელთა ასოციაციის პრეზიდენტის, ელგუჯა მელაძის თქმით, მნიშვნელოვანია ბიზნესს სწორი ინფორმაცია ჰქონდეს დაგეგმილი რეფორმის შესახებ, რისთვისაც აუცილებელია აქტიური კომუნიკაცია მთავრობასა და ბიზნესის წარმომადგენლებს შორის.

„მოვისმინეთ საინტერესო პრეზენტაცია. განაწილებული მოგების გადასახადის შემოღება სერიოზული შეღავათი იქნება ბიზნესისთვის, რადგან ეს თანხები, ისევ ინვესტიციებს და საწარმოების განახლებას, ინოვაციური პროექტების დაფინანსებას მოხმარდება“, - განაცხადა ასოციაციის პრეზიდენტმა, ელგუჯა მელაძემ.

 შეხვედრა ინტერაქტიულ რეჟიმში წარიმართა.  ფინანსთა სამინისტროს წარმომადგენლებმა უპასუხეს დამსაქმებელთა ასოციაციის წევრების მიერ დასმულ შეკითხვებს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

სადიგოვი - პუტინის მონამ, სამშობლოს მოღალატე ივანიშვილმა ჩემი საქართველოდან გაძევებით ძალიან დიდი დარტყმა მიაყენა საქართველოს

Freedom House - იდენტიფიცირებულია 6 ახალი სახელმწიფო - ავღანეთი, ბენინი, საქართველო, კენია, ტანზანია და ზიმბაბვე, რომლებიც იყენებენ ტრანსნაციონალურ რეპრესიებს

რუსეთის ქალაქ ტაგანროგში, სარაკეტო დარტყმის შემდეგ, დრონების მწარმოებელ ქარხანას ხანძარი გაუჩნდა

უკრაინის თავდაცვის ძალებმა ბოლო 24 საათის განმავლობაში კიდევ 1070 ოკუპანტი გაანადგურეს - გენერალური შტაბი