ოკუპირებული ცხინვალის დე-ფაქტო პროკურატურა რუსეთს სთხოვს, სააკაშვილზე საერთაშორისო ძებნა გამოაცხადოს

2017-07-11 14:19:07, 944 ნახვა

რეგიონი

ოკუპირებული ცხინვალის დე-ფაქტო პროკურატურამ რუსეთის პროკურატურას საქართველოს იმ მოქალაქეების ნუსხა გადასცა, რომლებსაც რეგიონში 2008 წელს „სამხედრო დანაშაულის ჩადენაში“ ადანაშაულებს, - ამის შესახებ Tass იუწყება.

მედია საშუალების ინფორმაციით, დე-ფაქტო უწყება აღნიშნულ პირებზე საერთაშორისო ძებნის გამოცხადებას ითხოვს.

ე.წ. სამხრეთ ოსეთის დე-ფაქტო პრეზიდენტის ანატოლი ბიბილოვის განცხადებით, ნუსხაში, საქართველოს ყოფილი პრეზიდენტი მიხეილ სააკაშვილი და სამხედრო მოსამსახურეები ფიგურირებენ. მისივე თქმით, სულ სია 76 ადამიანისგან შედგება.

„სამხრეთ ოსეთის გენპროკურატურამ რუსეთის გენერალურ პროკურატურას გადასცა ადამიანთა ნუსხა, საერთაშორისო ძებნის გამოსაცხადებლად. მასში მიხეილ სააკაშვილი და სხვა სამხედრო პირებიც მოხვდნენ, რომლებიც ადამიანთა მკვლელობაშ არიან ეჭვმიტანილნი“, - განაცხადა ბიბილოვმა.

მისი განმარტებით, ოკუპირებული ცხინვალის შესაბამისმა დე-ფაქტო უწყებებმა ასევე მოამზადეს დოკუმენტები ჰააგის საერთაშორისო სასამართლოში წარსადგენად, თუმცა ამ დრომდე, საქმის დაძვრა ვერ ხერხდება.

"სამწუხაროდ, ჩვენ ვერ ვხვდებით საერთაშორისო სასამართლოს დამოკიდებულებას იმ საშინელი ქმედებების მიმართ, რომელიც სააკაშვილმა განახორციელა სამხრეთ ოსეთთან მიმართებაში", - აღნიშნა ბიბილოვმა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან