ვოლოდიმირ ზელენსკიმ ქართველი მებრძოლი დააჯილდოვა

2025-05-07 10:56:46, 2876 ნახვა

სხვადასხვა

უკრაინის პრეზიდენტმა, ვოლოდიმირ ზელენსკიმ ქართველი მებრძოლი, აზოვის პოლკის ერთ-ერთი დამფუძნებელი, გიორგი ქუფარაშვილი დააჯილდოვა.

"დღეს პატივად მერგო, უმაღლესი მთავარსარდლისგან მიმეღო ჩემი ქვედანაყოფის და მისი თითოეული მებრძოლის დამსახურების, ბრძოლის და შრომის აღიარება — ქვედანაყოფის საბრძოლო დროშა. მადლობა პირველ რიგში ჩემს პირად შემადგენლობას გაღებული მძიმე ფასისათვის, რაც დღეს სახელმწიფომ და უმაღლესმა მთავარსარდლობამ აღიარა და, შესაბამისად, დააფასა. არაფერია იმაზე დიდი პატივი და სიამაყე სამხედროსთვის და მეთაურისთვის, ვიდრე მისი ქვედანაყოფის, პირადი შემადგენლობის შრომის და ბრძოლის დაფასება. ბრძოლა გამარჯვებამდე. დიდება უკრაინას", — წერს გიორგი ქუფარაშვილი და ვიდეოს აქვეყნებს.

ქართული არმიის თადარიგის ვიცე-პოლკოვნიკი, გიორგი ქუფარაშვილი ერთ-ერთი იმათგანია, ვინც ქალაქ მარიუპოლს რუსეთის ფართომასშტაბიანი ინტერვენციის პირველი დღეებიდან იცავდა. 2022 წლის 17 მარტს ერთ-ერთ ბრძოლაში ქუფარაშვილი დაიჭრა. მას ოპერაცია "აზოვსტალის" ქარხნის მიწისქვეშა სარდაფში გაუკეთეს და, მიუხედავად დაღუპვის აშკარა რისკისა, 22 მარტს უკრაინელი მფრინავების წარმოუდგენელი გმირობის ფასად, მან შეძლო ალყაშემორტყმული ქარხნიდან ევაკუაცია.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,