რუსმა ჯარისკაცმა სომხეთში ოჯახის ექვსი წევრი და მათ შორის 2 წლის გოგონა მოკლა (ვიდეო)

2015-01-13 11:16:07, 1171 ნახვა

მსოფლიო

რუსმა ჯარისკაცმა სომხეთში, ქალაქ გიუმრიში ოჯახის ექვსი წევრი და მათ შორის 2 წლის გოგონა ავტომატური იარაღით დაცხრილა. გადარჩა მხოლოდ ექვსი თვის ჩვილი. ექიმების შეფასებით, ჩვილის მდგომარეობა უკიდურესია.

ამის შესახებ ინფორმაციას „რუსთავი 2 „ ავრცელებს.

მკვლელობაში ეჭვმიტანილი რუსულ ბაზაზე მომსახურე, რიგითი ჯარისკაცი ვალერი პერმიაკოვი თურქეთის საზღვარზე დააკავეს.

ინფორმაციას ეჭვმიტანილის დაკავების შესახებ, სომხეთის პოლიციის პრესსამსახური ადასტურებს.
რადიო „თავისუფლების“ სომხეთის ბიუროს ჟურნალისტის სათენიკ კაღზვანციანის განცხადებით, მკვლელობა ადგილობრივი დროით დილის 6 საათზე მოხდა.

ჟურნალისტის თქმით, მკვლელობაში ეჭვმიტანილ პერმიაკოვმა ექვსი ადამიანი აკა 75-ის ტიპის ცეცხლსასროლი იარაღით მოკლა, შემდეგ მან იარაღი და სამხედრო ფორმა ადგილზე დატოვა, სამოქალაქო ტანსაცმელში ჩაცმული გავიდა და მიიმალა.

მომხდარმა მკვლელობამ ადგილობრივ მოსახლეობაში პანიკა გამოიწვია, დროებით დახურეს სკოლა და ბაღი.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან