პროტესტის 300 დღე და დაყრუებული რეჟიმი

2025-09-23 21:35:36, 4006 ნახვა

"ქართული ოცნების" ძალადობრივი რეჟიმის წინააღმდეგ დღეს პროტესტის მე 300-ე დღეა. არასოდეს საქართველოს ისტორიაში მსგავსი რამ არ ყოფილა. დღეს დილიდან საპროტესტო აქციებზე შეფასებები კეთდება, "ქართული ოცნება" კი ჩვეულ რეჟიმში ხალხის ხმას იგნორს უკეთებს.

კოალიცია ცვლილებისთვის“ ერთ-ერთი ლიდერი, საპატიმროში მყოფი ელენე ხოშტარია რუსთავის ციხიდან წერილს აქვეყნებს და პროტესტის მე -300 დღეზე წერს.

ხოშტარიას თქმით, “ეს არის უპრეცედენტო შემთხვევა ჩვენს ისტორიაში, როდესაც ასეთი შემართებით, დაუღლელად, რუტინულად, პრინციპულად, ყველანაირი რეპრესიების, ჯარიმების, პროვოკაციების მიუხედავად, საზოგადოება ერთიანად იბრძვის.“

დღეს უწყვეტი პროტესტის მე-300 დღეა. ეს არის უპრეცედენტო შემთხვევა ჩვენს ისტორიაში, როდესაც ასეთი შემართებით, დაუღლელად, რუტინულად, პრინციპულად, ყველანაირი რეპრესიების, ჯარიმების, პროვოკაციების მიუხედავად, საზოგადოება ერთიანად იბრძვის.

ბევრი რთული დღე გვქონდა, მაგრამ არ გავტყდით, არაფერმა არ გაგვაჩერა. არცერთი სინდისის პატიმარი არ გატყდა და მათ წინაშე პასუხისმგებლობა, მათი ღირსება გვმატებს ძალას.

ყველას ცინიკური მოლოდინი მახსოვს - ახლა დაიშლებიან, ახლა დაიშლებიან, პროტესტი არ მუშაობს.

მუშაობს, თან მაგრად.

1. ჩვენ მთელს მსოფლიოს ვანახეთ, რომ საქართველო არ არის რუსეთი და ,,რუსული ოცნება'';

2. “ოცნება” იზოლაციაშია, ჩვენი ხალხი აღფრთოვანებას იწვევს.

3. სანქციები ხალხის დამსახურებაა

4. “ოცნებაში” ერთმანეთს ჭამენ, რაც მხოლოდ სისტემის რყევის ნიშანია. ხშირად ამბობენ, როდემდე? იქამდე, სანამ არ გავიმარჯვებთ, ბოლომდე!

და აუცილებლად გავიმარჯვებთ, რადგან ჩვენ ვართ მეტნი, მართლები, თავისუფლები და მებრძოლები.

ჩემი პატივისცემა ყველა აქტივისტს სათითაოდ და ყველა სინდისის პატიმარს, - წერს ხოშტარია.

ბაჩო ქაჯაია დღეს იმ ადამიანების რიგებს შორის იქნება, ვინც უკვე 300 დღეა ქუჩაში ქვეყნის ევროპული მომავლის დასაცავად დგას, ახალ არჩევნებს და სინდისის პატიმრების გათავისუფლებას ითხოვს.

მსახიობის და ტელეწამყვანის თქმით, "ოცნების" მოლოდინი არ ასრულდა, ხალხი არ დაიღალა, არც ფარხ-მალი დაყარა და ისევ ისევ შემართებით იბრძვის. მისი ტქმით, სწორედ ასე ერთად და ასე შემართებით უნდა გაგძელდეს ბრძოლა ქვეყნის უკეთესი მომავლისთვის.

ყველაზე მნიშვნელოვანი მათთვის რაც იყო, რომ ეს პიკი გადაეგორებინათ და შემდეგ უკვე ხალხი დაიღლებოდა, ხალხს აღარ ექნებოდა ბრძოლისუნარიანობა, დაყრიდა ფარხმალს, რაც ასე არ აღმოჩნდა. ახლა რუსთაველის პროტესტი არის, როგორც ნაკვერჩხალს რომ ნაცარს დააყრი და ღვივის შიგნით, როდესაც ცეცხლი უნდა აინთოს, რომელიც ოლიგარქიას სჭირდება, ამ ნაცარს მერე ასე გადაქექავ და აინთება, რა თქმა უნდა ისევ შედეგიანად, რა თქმა უნდა, ისევ მედეგობით და ისევ მტკიცედ ბოლომდე", - ამბობს ბაჩო ქაჯაია.

პროტესტის 300 დღე იმის მაჩვენებელია, რომ სადაც აქამდე არ გავჩერდებით, არც ამის მერე გავჩერდებით, - ამის შესახებ სინდისის პატიმრის, ონისე ცხადაძის ძმა საუბრობს. სანდრო ცხადაძე პირდაპირ ამბობს, რომ მათ უკან დასახევი გზა არ დარჩათ და ამიტომ, მოვლენების ნებისმიერი განვითარების შემთხვევაში, ბრძოლას არ შეწყვეტენ.

პირველ რიგში, იმის ჩვენება გვინდა, რომ რაც პროგნოზი ჰქონდათ კობახიძეს და მის ძმებს, რომ თითქოს 20 იანვრამდე არ მივიდოდა ჯერ პროტესტი და მერე ბიძინას დაბადების დღემდე და მერე აღდგომამდე და ა.შ., ყველაფერი ტყუილი გამოდგა. ჩვენ ისევ იქ ვართ, რამდენიც არ უნდა დააკავონ, რამდენიც არ უნდა გვატერორონ, რამდენი ტროლი და ბოტიც არ უნდა მოგვისიონ, ოჯახის წევრებს ურეკონ, ჩვენ სხვა გზა არ გვაქვს და მივიყვანთ ამას ბოლომდე. ეს 300 დღეც იმის მაჩვენებელია, რომ სადაც აქამდე არ გავჩერდებით, არც ამის მერე გავჩერდებით როგორც არ უნდა განვითარდეს მოვლენები, - ამბობს ონისე ცხადაძის ძმა.

დაკავებებისა და განუწყვეტელი რეპრესიების მიუხედავად, „ქართულმა ოცნებამ“ ხალხის ნების გატეხვა ვერ შეძლო, - ამის შესახებ საქართველოს მეხუთე პრეზიდენტი, სალომე ზურაბიშვილი X-ზე წერს.

„პროტესტის 300 დღე მხოლოდ რიცხვი არ არის, ეს გამბედაობის მტკიცებულებაა. დაკავებებისა და განუწყვეტელი რეპრესიების მიუხედავად, „ქართულმა ოცნებამ“ ხალხის ნების გატეხვა ვერ შეძლო. ქართველები იბრძვიან არა მხოლოდ უსამართლობის წინააღმდეგ, არამედ ევროპის, დემოკრატიისა და თავისუფალი მომავლისთვის!“, - წერს სალომე ზურაბიშვილი.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან