ჩვენთვის ძალიან მძიმე და მოუშუშებელია იარა, რომელიც 2008 წლის აგვისტოს ომმა დაგვიტოვა, - ამის შესახებ საქართველოს პრემიერ-მინისტრმა ირაკლი ღარიბაშვილმა მუხათგვერდის ძმათა სასაფლაოზე განაცხადა, სადაც გმირთა მემორიალი გვირგვინით შეამკო.

მთავრობის მეთაურმა ომში დაღუპული გმირების ხსოვნას პატივი მიაგო და მათ ოჯახებს კიდევ ერთხელ მიუსამძიმრა.

2008 წლის აგვისტოს ომიდან 7 წლის თავზე, პრემიერ-მინისტრმა აღნიშნა, რომ დანაკარგი უმძიმესია, ხოლო მსხვერპლი, რომელიც საქართველოს მოქალაქეებმა გაიღეს - დასაფასებელი.

„ჩვენ დავკარგეთ ჩვენი გმირი ჯარისკაცები, პოლიციელები, პატრიოტი მეომრები, რომლებიც ომში გმირულად დაეცნენ. ქედს ვიხრი მათი სულისა და ოჯახების წინაშე. დღეს ვნახე მათი ოჯახის წევრები, შვილები, დედები, მეუღლეები. მინდა, მათ კიდევ ერთხელ მივუსამძიმრო და ვუთხრა, რომ სახელმწიფო მათ გვერდით დგას. რა თქმა უნდა, შედეგები ძალიან მძიმეა - ათასობით ახალი დევნილი, დამატებით დაკარგული 100-ზე მეტი სოფელი, ტერიტორიის 20%-ის ოკუპაცია, რუსეთის მიერ ჩვენი ტერიტორიების აღიარება. დღეს, რა თქმა უნდა, ოკუპაცია გრძელდება. ჩვენი მთავრობა გონივრული პოლიტიკით ცდილობს, ეს პროცესი შეაჩეროს“, - განაცხადა პრემიერმა.

ირაკლი ღარიბაშვილის შეფასებით, მშვიდობას ალტერნატივა არ აქვს და საქართველოს მთავრობის სურვილია, ქვეყანა იყოს სტაბილურობისა და დემოკრატიის გარანტი. პრემიერი მიიჩნევს, რომ დაკარგული ტერიტორიების შემოერთება და აფხაზ და ოს ძმებთან მშვიდობიანი თანაცხოვრება კონსტრუქციული მოლაპარაკებებისა და ნდობის აღდგენის გარეშე შეუძლებელია.

„რუსეთთან უნდა გავაგრძელოთ გონივრული პოლიტიკა, მაგრამ ვიქნებით მტკიცე და პრინციპულები, რადგან ეს არის ჩვენი წინაპრების მიერ დატოვებული ტერიტორია და ქართველი ხალხი არასოდეს შეეგუება, იცხოვროს აფხაზების და ოსების გარეშე", - განაცხადა ირაკლი ღარიბაშვილმა.

პრემიერ-მინისტრი მუხათგვერდის ძმათა სასაფლაოზე მინისტრთა კაბინეტის წევრებთან ერთად იმყოფებოდა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ირაკლი კობახიძე აშშ-ს სახელმწიფო დეპარტამენტის წარმომადგენლებს შეხვდა

ორ თვეში საქართველოს სანაპიროზე დაახლოებით 40 დელფინი გამოირიყა

„გახარია საქართველოსთვის“ მოსკოვსა და ცხინვალს შორის „შეთანხმების“ წინააღმდეგ რეზოლუციის ინიციატივით გამოდის

თითქოს სიღარიბის შემცირების გამო, რეჟიმი სოციალური დახმარებას გადახედავს, დავალება უწყებებმა უკვე მიიღეს