ქანთარია: ძალიან სამარცხვინოა, რომ ერთ დროს საქართველოს პრეზიდენტი, სახურავებზე დარბის

2017-12-05 14:22:54, 1533 ნახვა

კომენტარი

„თავისთავად არის ძალიან სამარცხვინო, რომ ერთ დროს საქართველოს პრეზიდენტი, სახურავებზე დარბის“, - ასე გამოეხმაურა „ქართული ოცნების“ დეპუტატი ნუკრი ქანთარია „რუსთავი 2“-თან საუბარში კიევში საქართველოს ყოფილი პრეზიდენტის მიხეილ სააკაშვილის დაკავებას.

„ეს არ არის ჯანსაღი სიტუაცია და ვფიქრობ, რომ ბატონი პოროშენკო იმას იმკის, რაც მან თავის დროზე დათესა და ეს იყო ძალიან დიდი შეცდომა ალბათ მათი, როდესაც მეგობარი ქვეყნის ძებნილი ადამიანი გუბერნატორად დანიშნა“, - განაცხადა ქანთარიამ.

დეპუტატი სააკაშვილის საქართველოში შესაძლო ექსტრადირების საკითხსაც გამოეხმაურა და აღნიშნა, რომ ეს ქართულ პოლიტიკაზე გავლენას ვერ მოახდენს.

შეგახსენებთ, უკრაინის უსაფრთხოების სამსახურმა საქართველოს ყოფილი პრეზიდენტი, ოდესის ოლქის ყოფილი გუბერნატორი მიხეილ სააკაშვილი დააკავა. მას დანაშაულებრივ ჯგუფებთან თანამშრომლობას და დანაშაულის დაფარვას ედავებიან.