ბრიტანეთის პარლამენტმა Brexit-ის კანონი მიიღო

2017-02-09 08:17:38, 2773 ნახვა

მსოფლიო

დიდი ბრიტანეთის თემთა პალატამ მიიღო კანონი Brexit-ის, ევროკავშირიდან ქვეყნის გასვლის პროცედურის ამოქმედების შესახებ, - ამის შესახებ BBC იუწყება.

მედია საშუალების ინფორმაციით, მესამე და ბოლო მოსმენის დროს კანონპროექტი ყოველგვარი შესწორების გარეშე ხმათა უმრავლესობით მიიღეს. მას მხარი 494-მა დეპუტატმა დაუჭირა, წ122 კი ინააღმდეგი იყო. ამის შემდეგ დოკუმენტი განსახილველად ბრიტანეთის ზედა, ლორდთა პალატას გადაეცემა.

როგორც BBC წერს, 3 თებერვალს, დიდი ბრიტანეთის მთავრობამ Brexit -ის გეგმა, ეგრეთ წოდებული "თეთრი წიგნი" გამოაქვეყნა, რომელშიც პრემიერ-მინისტრის ტერეზა მეის მიერ ფორმულირებული 12 მთავარი პუნქტი 77 გვერდზეა გაწერილი.

ცნობისთვის, 2016 წლის ნოემბერში, ტერეზა მეიმ განაცხადა, რომ 2017 წლის მარტის ბოლოს დაიწყებდა ევროკავშირთან Brexit-ზე მოლაპარაკებას. იანვარში, ქვეყნის უმაღლესმა სასამართლომ ის დაავალდებულა პარლამენტისგან თანხმობა მიეღო.

შეგახსენებთ, რომ გაერთიანებული სამეფოს ევროკავშირიდან გასვლის შესახებ რეფერენდუმი 2016 წლის 23 ივნისს ჩატარდა. ამ გადაწყვეტილებას მხარი პლებისციტში მონაწილე მოქალაქეების ნახევარზე მეტმა დაუჭირა, რის შემდეგაც მაშინდელი პრემიერ-მინისტრი დევიდ კამერონი გადადგა - ის ევროკავშირიდნ გასვლას ეწინააღმდეგებოდა. მისი ადგილი ტერეზა მეიმ დაიკავა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან