თავადაც არ არიან დარწმუნებულები, რომ შეძლებენ ამ რეჟიმში მუშაობას - თან მთავრობაში იყონ და თან ფაქტობრივად ოპოზიციური საარჩევნო კამპანია ჩაატარონ, - ასე აფასებს პოლიტოლოგი გია ნოდია „რესპუბლიკელების“ გადაწყვეტილებას, რომლის მიხედვითაც პარტია არჩევნებში მონაწილეობას დამოუკიდებლად მიიღებს.

როგორც პოლიტოლოგმა „ექსპრესნიუსთან“ საკითხის კომენტირებისას აღნიშნა „რესპუბლიკური პარტია“ გაორებულ პოზიციაში აღმოჩნდა. ნოდიას შეფასებით, იმ ტიპის კოალიცია, რაზეც „რესპუბლიკელები“ მიანიშნებენ ძალიან რთული იქნება, ვინაიდან ეს გაერთიანება ბიძინა ივანიშვილის პატრონაჟით არის შექმნილი.

„მათ შეუძლიათ მიანიშნონ რაღაც ევროპულ გამოცდილებაზე. საუბარი მაქვს ისეთ ვითარებაზე, როდესაც პარტიები კოალიციურ მთავრობაში შედიან, მაგრამ არჩევნებისთვის ცალ-ცალკე ემზადებიან და ცალ-ცალკე ატარებენ საარჩევნო კამპანიას. ჩემი აზრით, საქართველოში ამის შენარჩუნება ძალიან რთული იქნება. იმიტომ, რომ „ქართული ოცნება“ ჩვეულებრივი კოალიცია არ არის. ის არის გაერთიანება ბიძინა ივანიშვილის პატრონაჟის ქვეშ.

ალბათ რაღაც გაორებულ პოზიციაში აღმოჩნდებიან. მათ განცხადებაშიც ჩანს მათი გაორებულობა. ჯერ-ჯერობით რჩებიან თანამდებობებზე, მაგრამ შემდგომ თანდათანობით ეტაპობრივად ამ საკითხებს გადაწყვეტენ. თავადაც არ არიან დარწმუნებულები, რომ შეძლებენ ამ რეჟიმში მუშაობას - თან მთავრობაში იყონ და თან ფაქტობრივად ოპოზიციური საარჩევნო კამპანია ჩაატარონ“, - აცხადებს ნოდია.

პოლიტოლოგის თქმით, პარტიის განცხადებიდან გამოჩნდა, რომ პარტია საპარლამენტო ფრაქციებთან მუშაობაში ხედავს პრობლემებს. ნოდია არც იმას გამორიცხავს, რომ ვითარება მთავრობაშიც გართულდეს.

„ჯერჯერობით ასე ჩანს განცხადებიდან, რომ „რესპუბლიკელები“ კვირიკაშვილს თავის მეკავშირედ მიიჩნევენ. თვლიან, რომ კვირიკაშვილთან მუშაობა შეუძლიათ, მაგრამ აი კოალიციაში საპარლამენტო შემადგენლობაში ხედავენ უფრო მეტ პრობლემებს. შეიძლება ასე გაგრძელდეს - პარლამენტში მათ დამოუკიდებელი პოზიცია ჰქონდეთ, თუმცა ძირითადად „ქართულ ოცნებასთან“ ერთად იმოქმედონ და ამავე დროს მთავრობაში იმუშავონ პრემიერ-მინისტრთან ერთად, თუმცა შესაძლებელია ვითარება გართულდეს“, - განაცხადა გია ნოდიამ „ექსპრესნიუსთან“ საუბრისას.

ცნობისთვის, დღეს გამართულ პრესკონფერენციაზე "რესპუბლიკური პარტიის" თავმჯდომარემ ხათუნა სამნიძემ საზოგადოებას პარტიის გადაწყვეტილების შესახებ აცნობა. რომლის მიხედვითაც, "რესპუბლიკელები" საპარლამენტო არჩევნებში მონაწილეობას დამოუკიდებლად მიიღებს. მისივე თქმით, ეს არ ნიშნავს იმას, რომ პარტია კოალიციას დაუყოვნებლივ დატოვებს, არამედ ეს ნიშნავს იმას, რომ პროცესი ეტაპობრივად წარიმართება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ბრიტანეთის მიერ დასანქცირებული ქართული კომპანიების წინააღმდეგ გამოძიება დაიწყო

თიბისი კონცეპტი წარმოგიდგენთ თბილისის საერთაშორისო თეატრალურ ფესტივალს

კალაძე: ორი წლის წინ რეაბილიტირებულ მეტროსადგურ „ავლაბარში“ წყალი ისე ჩადიოდა, როგორც გარეთ, შეისწავლეთ საკითხი

Washington Post: აშშ-ს ყოფილი მოკავშირე საქართველო ირანის ორბიტაზე ექცევა