უკრაინის პრეზიდენტი ვოლოდიმირ ზელენსკი ამბობს, რომ უკრაინას ამერიკის შეერთებული შტატებისგან უსაფრთხოების გარანტიები გაცილებით ხანგრძლივი დროით - 30-40-50 წლით სურს, ამჟამინდელი სამშვიდობო გეგმის პროექტი კი - 15-წლიან გარანტიებს ითვალისწინებს.

უკრაინული მედია წერს, რომ დონალდ ტრამპთან შეხვედრის დასრულების შემდეგ, ვოლოდიმირ ზელენსკიმ ონლაინ მედიების შეკითხვებს უპასუხა, რა დროსაც თქვა, რომ აშშ-ის პრეზიდენტთან შეხვედრაზე დამტკიცდა, რომ უკრაინას აშშ-სგან ექნება უსაფრთხოების ძლიერი გარანტიები.

"მართლაც, ეს სამუდამო არ არის. დოკუმენტები ითვალისწინებს 15 წლიან ვადას, ამ უსაფრთხოების გარანტიების გახანგრძლივების შესაძლებლობით. ეს საკითხი პრეზიდენტთანაც დავაყენე. ვუთხარი, რომ ჩვენ ჯერ კიდევ ომში ვართ და ეს თითქმის 15 წელია მიმდინარეობს. ამიტომ, ძალიან მინდა, რომ გარანტიები უფრო ხანგრძლივი იყოს", - თქვა ვოლოდიმირ ზელენსკიმ.

უკრაინის პრეზიდენტის თანახმად, მის განცხადებაზე, რომ სურს, განიხილოს 30-40-50 წლიანი უსაფრთხოების შესაძლებლობა, დონალდ ტრამპმა განაცხადა, რომ ამაზე დაფიქრდება.

"მე მას [დონალდ ტრამპმს] ვუთხარი, რომ ძალიან გვსურს განვიხილოთ 30-40-50 წლის შესაძლებლობა და მაშინ ეს იქნება პრეზიდენტ ტრამპის ისტორიული გადაწყვეტილება. პრეზიდენტმა თქვა, რომ ამაზე დაფიქრდება", - თქვა ვოლოდიმირ ზელენსკიმ.

29 დეკემბერს აშშ-ის პრეზიდენტ დონალდ ტრამპსა და უკრაინის პრეზიდენტ ვოლოდიმირ ზელენსკის შორის ფლორიდაში, მარ-ა-ლაგოს რეზიდენციაში თითქმის 3-საათიანი მოლაპარაკებები გაიმართა. 

შეხვედრის შემდეგ დონალდ ტრამპმა მოლაპარაკებები "შესანიშნავად" შეაფასა და განაცხადა, რომ მხარეები ომის დასრულების შესახებ შეთანხმებასთან მნიშვნელოვნად დაახლოვდნენ.

უსაფრთხოების გარანტიებზე საუბრისას დონალდ ტრამპმა განაცხადა, რომ შეთანხმება ამ მიმართულებით თითქმის დასრულებულია, თუმცა ეკონომიკურ საკითხებსა და დონბასში შესაძლო თავისუფალი სავაჭრო ზონის თაობაზე შეთანხმება ჯერ მიღწეული არ არის.

შეხვედრის შემდეგ ვოლოდიმირ ზელენსკიმ განაცხადა, რომ უსაფრთხოების გარანტიები გრძელვადიანი მშვიდობის მიღწევის "უმნიშვნელოვანესი ეტაპია" და აღნიშნა, რომ უკრაინული და ევროპული გუნდები მუშაობას გააგრძელებენ. მისი თქმით, დამატებითი შეხვედრები უახლოეს კვირებში გაიმართება, ხოლო იანვარში პროცესში ვაშინგტონიც ჩაერთვება.

ავტორი: ექსპრესნიუსი,

სოციალური ქსელები

ჩეხეთის პრეზიდენტმა რუსეთს ინტერნეტთან კავშირის გათიშვა შესთავაზა.

დიუშენის კუნთოვანი დისტროფიის მქონე ბავშვების დასახმარებლად უკვე 1 300 000 ლარი შეგროვდა - მარათონი გრძელდება

26 მაისს დაგეგმილ დიდ საპროტესტო აქციას სტუდენტებიც უერთდებიან

NYT: ტრამპის ადმინისტრაცია ისრაელს ირანთან მოლაპარაკებებში გვერდზე უდგას