The Times Of Israel - მედიკოსები აცხადებენ, რომ ისრაელის თავდასხმას ღაზაში, სულ მცირე, 10 ადამიანი ემსხვერპლა

2024-12-26 11:29:17, 515 ნახვა

მსოფლიო

ღაზას სექტორზე ისრაელმა თავდასხმა განახორციელა, რის შედეგადაც, სულ მცირე, 10 ადამიანი დაიღუპა. ამის შესახებ ინფორმაციას The Times Of Israel-ი „ჰამასის“ მიერ კონტროლირებად ჯანდაცვის სამინისტროს წარმომადგენლებზე დაყრდნობით ავრცელებს.

მედიკოსების განცხადებით, იერიშის შედეგად არიან დაშავებულებიც, რომელთა ზუსტი რაოდენობა ამ დროისთვის უცნობია.

მათივე ცნობით, ღაზას სექტორის ქალაქ ზეიტუნში მდებარე სახლზე დარტყმას 5 ადამიანი ემსხვერპლა, 20 პირი კი დაშავებულია. სამედიცინო პერსონალის ვარაუდით, უამრავი ადამიანი ნანგრევებშია მოყოლილი.

მსხვერპლია ალ-ავდას საავადმყოფოს მიმდებარე ტერიტორიაზე ავტომობილზე მიტანილი იერიშის შედეგადაც, სადაც 5 ჟურნალისტი დაიღუპა.

როგორც ადგილობრივი მედია იტყობინება, აღნიშნულ ავტომობილზე იყო წარწერა, რომ სატრანსპორტო საშუალება მედიის წარმომადგენლებს ეკუთვნოდათ.

მომხდართან დაკავშირებით ისრაელის თავდაცვის ძალებში (IDF) ოფიციალური კომენტარი ჯერ არ გაუკეთებიათ.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,