გარემოს დაცვისა და სოფლის მეურნეობის მინისტრის მოადგილე  იური ნოზაძე და მცხეთა-მთიანეთის მხარეში სახელმწიფო რწმუნებული შალვა კერესელიძე დუშეთის მუნიციპალიტეტის სოფლების  ყვავილის, თანიანთკარის, არაგვისპირის,  ჩინთისა და დაბა ჟინვალის მოსახლეობას შეხვდნენ და სოფლებში არსებულ საჭიროებებსა და გამოწვევებს ადგილზე გაეცნენ.

ცენტრალური და ადგილობრივი ხელისუფლების წარმომადგენლებმა, მოსახლეობასთან  ერთად, სოფლებში არსებულ პრობლემებსა და მათი გადაჭრის გზებზე იმსჯელეს.  ადგილობრივებმა პრიორიტეტულ საკითხებად შიდა გზების მოწესრიგება, წყალმომარაგების გაუმჯობესება და სოფლების გაზიფიცირება დაასახელეს.

გარემოს დაცვისა და სოფლის მეურნეობის მინისტრის მოადგილემ, იური ნოზაძემ მსგავსი ფორმატის შეხვედრების მნიშვნელობაზე ისაუბრა და  აღნიშნა, რომ  მოსახლეობასთან პირდაპირი კომუნიკაცია საშუალებას იძლევა მოხდეს თითოეული სოფლის საჭიროების იდენტიფიცირება და მომავალი წლის ბიუჯეტში ასახვა.

როგორც მცხეთა-მთიანეთის მხარეში სახელმწიფო რწმუნებულმა, შალვა კერესელიძემ მოსახლეობას განუცხადა, მუნიციპალიტეტში არსებული პრობლემების მოგვარება ეტაპობრივად მოხდება.

ცენტრალური და ადგილობრივი  ხელისუფლების წარმომადგენლებმა მუნიციპალიტეტში განხორციელებულ, მიმდინარე და დაგეგმილ პროექტებზე ისაუბრეს. აღინიშნა, რომ რეაბილიტაცია უკვე ჩაუტარდა ჟინვალისა და ჩინთის წყალმომარაგების სისტემებს,  მიმდინარეობს ჟინვალში არსებული საბავშვო ბაღის შენობის გაფართოება, უახლოეს პერიოდში დასრულდება სარემონტო სამუშაოები არაგვისპირის საჯარო სკოლაში, ასევე მიმდინარეობს შიდა გზების მოწესრიგების სამუშაოები. ახლო მომავალში  იგეგმება ცენტრალური პარკის რეაბილიტაცია ჟინვალში და  წყლის სათავე ნაგებობის მოწყობა სოფელ ყვავილში.

დუშეთის მუნიციპალიტეტის სოფლების მოსახლეობასთან შეხვედრებს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე გიორგი წოწკოლაური, საქართველოს პარლამენტის დეპუტატები გიორგი მოსიძე, ისკო დასენი, თენგიზ ხუბულური და დუშეთის მუნიციპალიტეტის მერი ზურაბ სეხნიაშვილი ესწრებოდნენ.

ცენტრალური და ადგილობრივი ხელისუფლების წარმომადგენლები შეხვედრებს მცხეთა-მთიანეთის რეგიონის სხვა მუნიციპალიტეტების მოსახლეობასთანაც  გაიმართავენ.

(NS)

ავტორი: ექსპრესნიუსი,

სოციალური ქსელები

კობახიძე: დღეს საქართველო არის დამოუკიდებელი და სუვერენული, როგორც არასდროს

ყაველაშვილი: კარგად უნდა გავაცნობიეროთ, დამოუკიდებლობა არაა სამუდამოდ ბოძებული მოცემულობა

შიო III: თავისუფლება მხოლოდ პოლიტიკურ მონაპოვრად და წარსულის მემკვიდრეობად არ უნდა ვაქციოთ

დიუშენის მქონე ბავშვების მშობლები დამოუკიდებლობის დღესთან დაკავშირებით განცხადებას ავრცელებენ