თორნიკე რიჟვაძე ბათუმის უნივერსიტეტის სტუდენტებს შეხვდა

2018-07-26 15:16:02, 487 ნახვა

რეგიონი

აჭარის მთავრობის თავმჯდომარემ თორნიკე რიჟვაძემ პირველი საჯარო შეხვედრა ბათუმის შოთა რუსთაველის სახელმწიფო უნივერსიტეტის სტუდენტებთან გამართა.

შეხვედრა ზაფხულის საჯარო ლექციების ფარგლებში გაიმართა, რომელიც საქართველოს საგარეო პოლიტიკას და მის პრიორიტეტებს დაეთმობა.

მთავრობის თავმჯდომარე სტუდენტებსა და უნივერსიტეტის პროფესორ-მასწავლებლებს მიესალმა და ქვეყნის განვითარების საქმეში ახალგაზრდების ჩართულობის მნიშვნელობაზე ისაუბრა. თორნიკე რიჟვაძემ სტუდენტევს ზაფხულის სკოლის გახსნა მიულოცა და განსაკუთრებული ყურადღება სწორედ ევროინტეგრაციის მიმართულებით დადებით დინამიკაზე გაამხვილა.

„ჩვენი გზა ევროინტეგრაციის მიმართულებით არის შეუქცევადი პროცესი. ამ პროცესში მნიშვნელოვანია ჩვენი ახალგაზრდობის ჩართულება და იმ ღირებულებების და მთავარი მიმართულებების ცოდნა და ასევე ხედვები, რომლებიც ქვეყანას წაადგება ამ ძირითადი მისიის წარმატებით შესრულებაში", - აღნიშნა თორნიკე რიჟვაძემ.

აჭარის მთავრობის თავმჯდომარესთან ერთად უნივერსიტეტში გამართულ შეხვედრას აჭარის განათლების, კულტურისა და სპორტის მინისტრი ინგა შამილიშვილი, ასევე აჭარის უმაღლესი საბჭოს განათლების, კულტურისა და სპორტის საკითხთა კომისიის თავმჯდომარე ვლადიმერ მგალობლიშვილი ესწრებოდნენ.

ბათუმის შოთა რუსთაველის სახელმწიფო უნივერსიტეტში საქართველოს საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევითი ინსტიტუტისა და ბსუ-ს ორგანიზებით საჯარო ლექციები სამი დღის განმავლობაში გაგრძელდება.

(NS)