2018-03-23 20:10:13, 1635 ნახვა

---

წულუკიანი: საკონსტიტუციო ცვლილებებიდან გამომდინარე, მართლმსაჯულების სისტემა კიდევ უფრო დამოუკიდებელი და გაძლიერებული გამოდის

„მინდა ყველას მივულოცო უმნიშვნელოვანესი საკონსტიტუციო რეფორმის დასრულება ამით ჩვენ სრულფასოვნად გადავდივართ საპარლამენტო რესპუბლიკის მოდელზე",- ამის შესახებ იუსტიციის მინისტრმა თეა წულუკიანმა განაცხადა. 

მინისტრის თქმით, ამ ცვლილებებიდან გამომდინარე, მართლმსაჯულების სისტემა კიდევ უფრო დამოუკიდებელი და გაძლიერებული გამოდის.

„მნიშვნელოვანია ის, რომ ყველა სახელმწიფო ინსტიტუტი იქნება უფრო მაღალი ხარისხით ანგარიშვალდებული პარლამენტის წინაშე, ხოლო მართლმსაჯულების  სისტემა ამ ცვლილებებიდან გამოდის კიდევ უფრო დამოუკიდებელი და გაძლიერებული. მნიშვნელოვანია ის, რომ ჩვენ ამ ტექსტში დავაფიქსირეთ ისეთი სიახლეები როგორიც არის ქალთა და მამაკაცთა თანასწორობა კანონის წინაშე, ბავშვთა საუკეთესო ინტერესი, ასევე ჩაწერილია ის, რომ შშმ პირთა უფლებები უნდა იყოს უფრო მაღალი ხარისხით დაცული და ასევე, მნიშვნელოვანია ორი რამ ჩვენთვის, იუსტიციის სამინისტროსთვის, რომ საპროკურორო საბჭო ხდება კონსტიტუციური ორგანო, მთავარი პროკურორი უფრო მაღალი ხარისხით იქნება ანგარიშვალდებული პარლამენტის წინაშე და ის რომ ადვოკატის როლი არის გაძლიერებული   ამ კონსტიტუციით“,- განაცხადა თეა წულუკიანმა. 

მინისტრმა აღნიშნა, რომ ვენეციის კომისიამ, იუსტიციის სამინისტროს ინიციატივით მე-18 მუხლში შეტანილი საჯარო ინფორმაციასთან დაკავშირებული ნოვაციები და ცვლილებები დადებითად შეაფასა.
 
„არ შემიძლია არ აღვნიშნო ისიც, რომ ვენეციის კომისიამ, მიუხედავად არასამთავრობო სექტორის დაუსაბუთებელი კრიტიკისა, იუსტიციის სამინისტროს ინიციატივით მე-18 მუხლში შეტანილი საჯარო ინფორმაციასთან დაკავშირებული ნოვაციები და ცვლილებები დადებითად შეაფასა და ამ კონსტიტუციასთან ერთად ახალი მე-18 მუხლიც შევა ძალაში, რაც გზას გაუხსნის ჩვენს ქვეყანას ინფორმაციის თავისუფლების აქტისკენ",- განაცხადა წულუკიანმა. 
 
პარლამენტმა ახალი რედაქციის კონსტიტუციაში ცვლილებები 115 ხმით, მესამე მოსმენით დაამტკიცა. ცვლილებები გასული წლის სექტემბერში მიღებული კონსტიტუციის პროექტში აისახება, რომელიც ძალაში მიმდინარე წლის ოქტომბერში - ახალარჩეული პრეზიდენტის მიერ ფიცის დადების შემდეგ შედის.

ახალმიღებული კონსტიტუციის კორექტირება რამდენიმე შინაარსობრივი ცვლილების განსახორციელებლად, მათ შორის ე.წ. ბონუსის სისტემის გაუქმებისა და 2020 წლის არჩევნებში, ერთჯერადად, საარჩევნო ბლოკების დაშვების მიზნით გადაწყდა. 

ამასთან, საკონსტიტუციო ცვლილებების ინიცირება იმგვარად მოხდა, რომ პარლამენტს განსახილველად ახალი რედაქციის კონსტიტუცია მთლიანად - პრეამბულიდან დაწყებული გარდამავალი დებულებების ჩათვლით წარედგინა და ახალი კონსტიტუციის 78-ვე მუხლის ხელახალი განხილვა, გადახედვა მოხდა. ამ პროცესში კი, მთელ რიგ მუხლებში განხორციელდა როგორც შინაარსობრივი, ასევე რედაქციული, ტერმინოლოგიური და ტექნიკური სახის ცვლილებები. მათ შორის ცვლილებები შევიდა კონსტიტუციის მე-18 მუხლში, რომელიც საჯარო ინფორმაციაზე ხელმისაწვდომობას ეხება. 

კონსტიტუციური კანონის პროექტი შემდეგ ძირითად ცვლილებებს ითვალისწინებს: კონსტიტუციის ახალი რედაქციიდან ე.წ. ბონუსის სისტემის ამოღება ხდება. ახალი ვერსიის თანახმად, გაუნაწილებელ საპარლამენტო მანდატებს თანმიმდევრობით უკეთესი შედეგის მქონე პოლიტიკური პარტიები მიიღებენ.

მომდევნო საპარლამენტო არჩევნებში მონაწილეობის შესაძლებლობა, პოლიტიკური პარტიების გარდა, საარჩევნო ბლოკებსაც ექნებათ.

გარდა ამისა, ფართოვდება საკონსტიტუციო სასამართლოს უფლებამოსილებები საარჩევნო ნორმებისა და არჩევნების არაკონსტიტუციურად ცნობასთან დაკავშირებით. კერძოდ, სამი თვით იზრდება შესაბამისი სარჩელის განხილვის ვადები. ასევე, უქმდება ჩანაწერი, რომლის თანახმად, არჩევნების კონსტიტუციურობის საკითხს საკონსტიტუციო სასამართლო სიითი შემადგენლობის სრული თანხმობით წყვეტს. 

ახალმიღებულ კონსტიტუციაში ტერმინი ”ხმოსანი” აღარ იარსებებს. ”ხმოსანი“ ტერმინით - ”საარჩევნო კოლეგიის წევრი“ იცვლება.

 

(NS)

---

ავტორი: ,

---

დღის თემა

მთავარი თემა

ინტერვიუ - ექსკლუზივი