პროკურორი: „ბირჟა მაფიის“ წევრებისგან მიღებულ ინფორმაციას შევაჯამებთ და გადაწყვეტილებას მივიღებთ როგორ ვიმოქმედოთ

2017-06-11 16:09:18, 2079 ნახვა

სამართალი

„ჩვენს მიერ გამოიკითხა ორივე ბრალდებული და მათ მოგვაწოდეს ინფორმაცია დაკავებასთან დაკავშირებით“,- ამის შესახებ ჰიპ-ჰოპ პროექტის, ”ბირჟა მაფიას” ბრალდებული წევრების გამოკითხვის შემდეგ პროკურორმა დავით გუმბერიძემ გლდანის მერვე სასჯელაღსრულების დაწესებულებასთან ჟურნალისტებს განუცხადა.

როგორც გუმბერიძემ აღნიშნა, ამ ეტაპზე არ გამოუკითხავთ ის სამართალდამცველები, რომლებსაც ბრალდებულები უფლებების დარღვევაში ადანაშაულებენ.

„ჩვენ მიერ გამოიკითხა ორივე ბრალდებული, მგალობლიშვილი და ქებურია. მათ მოგვაწოდეს ინფორმაცია დაკავებასთან დაკავშირებით. კონკრეტულად მიგვითითებდნენ იმ სამართალდარღვებზე, რაზეც ადვოკატები და თავად აპელირებდნენ სასამართლო პროცესზე. რა თქმა უნდა, ჩვენი მხრიდან სრულად იქნა ასახული ეს ინფორმაცია, გადავხედავთ ყველა ამ დეტალს და ამის შემდეგ მივიღებთ კანონის შესაბამის გადაწყვეტილებას გამოძიების დაწყებასთან დაკავშირებით",-განაცხადა პროკურორმა და დასძინა, რომ გამოძიების დაწყების საკითხის გადაწყვეტასთან ერთად ყველა საგამოძიებო მოქმედება გატარდება.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან