დედაენის დღის აღსანიშნავად საქართველოს იუსტიციის სასწავლო ცენტრში ქართული ენის ცოდნის დონის განმსაზღვრელი ტესტირების მონაწილეთა დაჯილდოება გაიმართა. 

როგორც "ექსპრესნიუსს" იუსტიციის სამინისტროდან აცნობეს, თეა წულუკიანმა ტესტირების საუკეთესო შედეგის მქონე 10 მონაწილე დააჯილდოვა. იუსტიციის სასწავლო ცენტრში შემუშავებული ტესტის ავტორი ენათმეცნიერი ნინო შარაშენიძეა.  

იუსტიციის სამინისტროს ინფორმაციით, ქართული ენის ცოდნის დონის განსაზღვრის მიზნით ორი ტიპის ტესტი შეიქმნა: პირველი ადგენს მშობლიური ენის ცოდნის დონეს საქართველოს იუსტიციის სამინისტროში მომუშავე ან ნებისმიერი სხვა დაინტერესებული პირისათვის, ხოლო მეორე აფასებს ქართული ენის, როგორც უცხო ენის, ცოდნას ევროპის საბჭოს მიერ შემუშავებულ პრინციპებზე დაყრდნობით და ცოდნის A, B და C დონეებს განსაზღვრავს.  

სამინისტროს ცნობით, პირველი საცდელი ტესტირება 11 აპრილს გაიმართა. ტესტირება იუსტიციის მინისტრმა და მისმა მოადგილეებმაც - ალექსანდრე ბარამიძემ და გოჩა ლორთქიფანიძემ - გაიარეს, რითაც იუსტიციელებს მაგალითი მისცეს სახელმწიფო ენის დაცვის საქმეში. პირველ ეტაპზე ქართულ ენაში ტესტირება იუსტიციის სამინისტროს 26-მა თანამშრომელმა და 40-მა დაინტერესებულმა პირმა გაიარა. 
„სიმბოლურია, რომ მშობლიური ენის ცოდნაში საუკეთესო შედეგი სწორედ თბილისის სახელმწიფო უნივერსიტეტის სტუდენტმა ანა ბადალაშვილმა აჩვენა. 1978 წლის 14 აპრილს სწორედ უნივერსიტეტებმა, პროფესორებმა და სტუდენტებმა იბრძოლეს სხვებთან ერთად ქართული ენის დაცვისათვის და წინ აღუდგნენ მისი განადგურების მცდელობას. ეს ტესტი მინდა, უკვე ხვალიდან გახდეს სავალდებულო ყველა იუსტიციელისთვის და მათთვის, ვინც ჩვენს სისტემაში მუშაობას მოისურვებს. ასევე, მეამაყება, რომ ქართულის, როგორც უცხო ენის, ცოდნის ტესტში ხუთი საუკეთესო შედეგის მქონე ჩვენი ახალგაზრდა მოქალაქეები, ეთნიკური აზერბაიჯანელები არიან“, − განაცხადა თეა წულუკიანმა. 

ქართული ენის ცოდნის დონის განმსაზღვრელი ტესტი იუსტიციის სამინისტროს სისტემაში მოქმედ მოქალაქეობის საკითხთა განმხილველ კომისიას და ქართული ენის სწავლებაში ჩართულ პირებს ხელს შეუწყობს, განსაზღვრონ მოქალაქეობის მოპოვებისა და სახელმწიფო ენის შესწავლის მსურველთა ცოდნის დონე, დაგეგმონ მათთვის ქართული ენის შესწავლის პროცესი და მათ ენის სრულყოფილად ათვისებაში დაეხმარონ. 

დაჯილდოების პარალელურად, დედაენის დღესთან დაკავშირებით, იუსტიციის სასწავლო ცენტრში ქართული ანბანისა და ქართული შრიფტის ისტორიის ამსახველი ფოტოების გამოფენაც მოეწყო. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ნატო რუსეთის საზღვრებთან 60 000 ჯარისკაცამდე გააძლიერებს თავის ყოფნას

ოპოზიციურმა ალიანსმა პატიმრების ოჯახებისთვის თანხების შეგროვების კამპანიის დაწყების შესახებ განაცხადა.

გვარამიამ საქართველოში ახალი საპროტესტო აქციები და „ახალი რეალური არჩევნები“ დააანონსა

ზელენსკი: უკრაინა მზადაა საქართველოსთან ორმხრივად სასარგებლო ურთიერთობებისთვის