თბილისის სატრანსპორტო კომპანია და მისი გენერალური დირექტორი ევროპის ბიზნეს ასამბლეის ნომინანტები გახდნენ

2016-03-31 17:16:36, 560 ნახვა

საზოგადოება

ევროპის ბიზნეს ასამბლეა (EBA) 2016 წლის 29 ივნისს, გერმანიის ქალაქ ბად-ემსში ფორუმს - International Prime Business Destinations გამართავს.

როგორც „ექსპრესნიუსს“ თბილისის მერიიდან აცნობეს, სხვადასხვა ნომინაციებში დაჯილდოვდებიან რეგიონალური მნიშვნელობის წარმატებული კომპანიები და მათი მენეჯერები.

მათივე ინფორმაციით, ევროპის ბიზნეს ასამბლეის საინიციატივო საბჭო რეკომენდაციას უწევს თბილისის სატრანსპორტო კომპანიას და მის გენერალურ დირექტორს ალექსანდრე ჯაფარიძეს შემდეგ ნომინაციებზე - „საუკეთესო საწარმო“ და „წლის მენეჯერი“.

„მიგვაჩნია, რომ თბილისის სატრანსპორტო კომპანია არის მაღალი პროდუქტიულობის მქონე ორგანიზაცია, რადგან ფლობს მყარ პოზიციას საერთაშორისო ბაზარზე, აქვს სურვილი გააფართოვოს საერთაშორისო თანამშრომლობის საზღვრები და უზრუნველყოს როგორც დასაქმებული პერსონალის კეთილდღეობა, ასევე მომხმარებლების კმაყოფილება მაღალი ხარისხის პროდუქციის შეთავაზებით“ - აღნიშნულია ევროპის ბიზნეს ასამბლეის მიერ გამოგზავნილ წერილში.

აღნიშნული მიღწევა განაპირობა თბილისის სატრანსპორტო კომპანიის ერთიანი გუნდის თავდაუზოგავმა შრომამ და მაღალმა პროფესიონალიზმმა, რაც მთლიანად კომპანიისა და თითოეული თანამშრომლის წარმატებაა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან