სერგო რატიანი: წიკლაურის საქმის გამოუძიებლობა, საფუძველს ქმნის, რომ გატაცება ხელისუფლებამ დაგეგმა

2015-05-04 16:36:47, 467 ნახვა

პოლიტიკა

„ნაციონალური მოძრაობის“ წევრმა სერგო რატიანმა ბიუროს სხდომაზე დეპუტატებს 1 წლის წინ ნუგზარ წიკლაურის ცემის ფაქტი შეახსენა.
როგორც მან განაცხადა, ამ ფაქტთან დაკავშირებით პარლამენტში საგამოძიებო კომისიაც უნდა შექმნილიყო.
რატიანის თქმით, ვინაიდან ამ დრომდე ეს საქმე გამოძიებული არ არის, ქმნის იმის საფუძველს, რომ წიკლაურის ცემა და გატაცების მცდელობა ხელისუფლების მიერაა დაგეგმილი.
ამასთან, მისივე ინფორმაციით, გუშინ, ნუგზარ წიკლაურის მძღოლს თავს დაესხნენ და ფიზიკური შეურაცხყოფა მიაყენეს.
დეპუტატის განცხადებით, თუ ეს ფაქტიც არ იქნება გამოძიებული, საპარლამენტო უმცირესობას ექნება ვარაუდი, რომ წიკლაურის მძღოლზე თავდასხმაც ხელისუფლებამ დაგეგმა.
„დაახლოებით ერთი წლის წინ, ჩვენს კოლეგა ნუგზარ წიკლაურზე თავდასხმა განხორციელდა. იყო გატაცების მცდელობაც. გავიდა დრო და ეს საქმე გამოძიებული არ არის. წესით ჩვენ საპარლამენტო კომისიაც უნდა შეგვექმნა, მაგრამ არც ამაზეა საუბარი. თავისთავად ეს საფუძველს გვაძლევს, ვივარაუდოთ, რომ ეს იყო ხელისუფლების მიერ დაგეგმილი. ვსაუბრობ, ფორმებზე და ასევე ვადებზე. გარდა ამისა, გუშინ უკვე ნუგზარ წიკლაურის სახლთან ნუგზარ წიკლაურის მძღოლს დაესხნენ თავს, მიაყენეს ფიზიკური შეურაცხყოფა, შემდეგ მანქანით დაედევნენ. ეს ყველაფერი პოლიციაში დაფიქსირებულია. თუ უმოკლეს ვადაში გამოძიებული არ იქნება ეს შემთხვევა, ჩვენ შეგვექმნება საფუძველი ასევე ვივარაუდოთ, რომ ესეც ხელისუფლების მიერაა დაგეგმილი. ჯერჯერობით ჩვენ ამაზე სპეკულაციას ნამდვილად არ ვაპირებთ. ვაძლევთ შესაძლებლობას , რომ გამოიძიონ. მაგრამ ის, რაც ერთი წლის განმავლობაში ხდებოდა, ეს არის პარლამენტის ღირსების საკითხი. მას შემდეგ ხელისუფლებას ფაქტობრივად არაფერი გაუკეთებია“, - განაცხადა რატიანმა.